Aqtóbeniń tergeý abaqtysynan tutqyn qashyp ketti
ASTANA. Mamyrdyń 31-i. QazAqparat /Ǵalymjan Hasenov/ - Aqtóbe qalasynyń tergeý abaqtysynan qamaýda otyrǵan azamat qashyp ketti, dep habarlady Ádilet mınıstrliginiń Qylmystyq-atqarý júıesi komıtetiniń baspasóz qyzmetinen.
Jeksenbi, mamyrdyń 30-y kúni saǵat 16.00-da KA168/1 mekemesinde (Aqtóbe qalasyndaǵy tergeý abaqtysy) sharýashylyq aýlany abattandyrý jumystaryn júrgizý kezinde qamaýdaǵy bir azamattyń joǵalyp ketkeni anyqtalady. 1987 jyly týǵan álgi azamat buǵan deıin de tonaý jáne alaıaqtyq qylmystary úshin úsh ret sottalǵan, delingen baspasóz baıanynda.
Oqıǵa ornyna Qylmystyq-atqarý júıesi komıteti men túzetý mekemelerindegi zańdylyqtardyń saqtalýyn qadaǵalaý jónindegi arnaıy prokýratýranyń ókilderi jáne Aqtóbe qalasy Іshki ister basqarmasynyń jedel-tergeý toby keldi. Aımaqtyń qylmystyq-atqarý júıesi garnızonynyń jeke quramy dabyl boıynsha kóterildi. Qazirgi tańda olar quqyqqorǵaý organdarymen birlese otyryp, qashqyndy izdestirý sharalaryn júrgizýde.
