Aqtóbeniń temirjol vokzalynda qaýipsizdik kúsheıtiledi
AQTÓBE. QazAqparat - Aqtóbeniń vokzalyna jolaýshylardyń júgin tekseretin qondyrǵy ornatyldy. 1 maýsymnan bastap jolaýshylar men olardyń júgi tekserýden ótkiziledi, dep habarlaıdy QazAqparat tilshisi.
Aqtóbeniń temirjol vokzalynda qaýipsizdik sharasy kúsheıtildi. Qytaıdan ákelingen qondyrǵy jolaýshylardyń júgi men adamdardy tekserýge arnalǵan. Sondyqtan aldaǵy ýaqytta jolaýshylar poıyz ýaqytynan 1 saǵat buryn vokzalǵa kelýi tıis.
«Temirjol vokzaldaǵy qaýipsizdikti qamtamasyz etý maqsatynda zań talaptaryna sáıkes 1 maýsymnan bastap Aqtóbe temir jol vokzalynda jolaýshylardyń qol júgi men júkterin tekserý rásimi engiziledi. Tekserý rásimi vokzal ǵımaratyna kiretin-shyǵatyn oryndaryna ornatylǵan qurylǵylardan adamdardy ótkizý arqyly iske asyrylady. Al olardyń júkteri rentgen televızııalyq qondyrǵysy arqyly tekseriledi. Vokzal ǵımaratyna kirý qajet bolmaǵan jaǵdaıda jolaýshy onyń aýmaǵyn aınalyp óte alady. Júkter men qol júrginen sýyq qarý, dárimen atylatyn qarý, ýly zattar, tutanǵysh, jarylǵysh, ıisi ótkir zattar tekseriledi. Olardy alyp júrýge tyıym salynady»,- dedi Aqtóbedegi NJS-11 vokzal sharýashylyǵy boıynsha bólim bastyǵy Ardaq Dosmuhambetov.
Aldyn-ala boljam boıynsha 1 mınýtta 1 adam tekserýden ótedi. Vokzalǵa kún saıyn 3 myńǵa jýyq jolaýshy, shyǵaryp salýshy men bılat satyp alýshy keledi eken. Osy jaıtty eskergen ákimshilik qyzmetkerleri poıyzǵa minetin adamdardy ýaqyttan 1 saǵat buryn kelýin aıtýda.
«Alǵashynda vokzalǵa kelýshilerdiń bárin teksermeımiz. Adamdar úırengenshe tek kúdiktiler qaralyp, baqylaýǵa alynady. Al halyq úırengen soń bárin jappaı, arnaıy qurylǵymen tekseremiz»,- dedi A. Dosmuhambetov. Bul jumysty áskerılendirilgen temirjol qyzmeti atqarady. Olar daıyndyqtan ótken.
