Aqtóbeniń Temir qalasynda jańa dárigerlik ambýlatorııa ashyldy
AQTÓBE. QazAqparat – Aqtóbeniń Temir qalasynda dárigerlik ambýlatorııa ashyldy. Medıtsınalyq mekemeni salýǵa 72 mıllıon teńge qarajat jumsaldy, dep habarlaıdy QazAqparat tilshisi.
Aqtóbe oblysy boıynsha bıyl 6 dárigerlik ambýlatorııa salynyp jatyr. Onyń ekeýi qoldanysqa berildi, ózgesiniń qurylysy jalǵasady.
«Búgin Temir qalasynda aýysymyna 50 adamǵa qyzmet kórsetetin medıtsınalyq mekeme iske qosyldy. Sonymen qatar munda kúndizgi statsıonarda em qabyldaý úshin alty kereýet qoıylǵan. Dárigerlik ambýlatorııa jergilikti bıýdjet esebinen salyndy. Qurylys jumystaryna 72 mıllıon teńge jumsaldy», - dedi oblystyq densaýlyq saqtaý basqarmasynyń basshysy Áset Qalıev.
Aıta keteıik, Aqtóbe oblysy ákiminiń apparatynyń jetekshisi Nurjaýǵan Qalaýov dárigerlik ambýlatorııanyń aǵa dárigeri Venera Shamsýtdınovaǵa sanıtarlyq kólik satyp alý úshin 5,9 mıllıon teńgeniń sertıfıkatyn tabys etti. Temir qalasynyń 150 jyldyǵy aıasynda salynǵan medtsınalyq mekemede 9 adam jumys isteıdi. Burynǵy ǵımarat ótken ǵasyrdyń 70 jyldary qoldanysqa berilip, eskirgen bolatyn.
