Aqtóbeniń shalǵaı aýylynda qurt shyǵarylyp jatyr
AQTÓBE. QazAqparat - Aqtóbe oblysy Yrǵyz aýdany Nura aýylynda qurt shyǵarylyp jatyr. Qurtty qaptaýǵa arnalǵan qural-jabdyq Qytaıdan ákelindi, dep habarlaıdy QazAqparat tilshisi.
Aqtóbede qurt shyǵyryla bastady. «Týǵan jerge taǵzym» aktsııasy aıasynda Yrǵyzdyń Nura aýylynda týyp-ósken Qanat Ermaǵanbetov, Aıbol Álqýatov aýyldan kásip ashty. Shaǵyn tseh ishinde qurt jasalyp, qaptalady. Sonymen qatar, Yrǵyz aýdanynyń balaǵy vakýmge salynyp, satýǵa shyǵarylady.
«Álı-Nur» jeke sharýashylyǵynyń ıeleri Aqtóbe qalasynda turady. Týǵan jerge kómek kórsetýdi maqsat etken kásipkerler bıyl aýylǵa qurt jasap, qaptaıtyn, keptirilgen balyqty vakýmge salyp, tsellofanǵa oraıtyn apparat ákeldi. Aýylda eki adamdy jumysqa aldy. Tseh sút pen súzbe qabyldaıdy. Aýyl turǵyndary úshin de sút tabys kózine aınaldy. Buryn áıelder sıyr saýmaıtyn edi, qazir tapsyryp otyr. Súzbeniń kelisin 700 teńgege qabyldaıdy. Al aı saıyn 200-300 keli súzbe óńdelip, qurt shyǵarylady»,- dedi Nura aýylynyń ákimi.
Qurt shyǵaratyn tseh qysta da jumys isteıdi. Aýylda jeke úıler daıyndaǵan qurtty satyp alyp, óńdeýden ótkizetin tsehnyń daıyn ónimine suranys joǵary. Aıyna eki ret daıyn ónim Aqtóbe oblysynyń ortalyǵyna jetkiziledi. Sonymen qatar, balyq qaqtaıtyn tseh iske qosylady. Yrǵyzdyń balyǵy vakýmge salynyp, arnaıy saýda oryndaryna jetkizip jatyr.
«Qurt tabıǵı ónim. Súzbe men tuz ǵana bar, qospasy joq. Kásipkerlerdiń aýylǵa kelip, is bastaýy qarapaıym halyq úshin úlken kómek bolyp tur. Kóshý úrdisi toqtap, adamdarǵa jumys tabyldy. Jalpy Nura aýylynda 21 sharýa qojalyǵy bar. Aýyl mańyndaǵy eki kóldi de kásipkerler jalǵa aldy. Baıtaq kólinen balyq aýlap, kommýnaldyq bazarǵa shyǵaryp jatyr. Jyl saıyn Qyzylordadan shabaq ákelip, jiberedi»,- dedi Nura aýylynyń ákimi Jolaýshybaı Tólebaıuly.
