Aqtóbeniń shalǵaı aýyldarynda mektepter men áleýmettik nysandar ashyldy
AQTÓBE. QazAqparat - Aqtóbeniń Shalqar aýdanynda birneshe áleýmettik nysan paıdalanýǵa berildi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysynyń ákimi Ońdasyn Orazalın aldymen Toǵyz aýyldyq okrýgtegi 120 orynǵa arnalǵan №7 jalpy orta mekteptiń ashylý sharasyna qatysty. Qurylys jumystary 2018 jyldyń mamyr aıynda bastalǵan bolatyn. Oblys ákimi mektep ishin aralap kórdi.
«Sonymen qatar Shalqar qalasyndaǵy M.Shymanuly aýylynda 60 oryndyq Saryqamys negizgi orta mektebi el ıgiligine berildi. Qurylysy 2017 jyly bastalǵan bilim oshaǵy jańa oqý jylyna saqadaı saı. Zaman talabyna saı salynǵan mektepte sport zaly, ashana, kitaphana bar», -dep habarlady oblys ákiminiń baspasóz qyzmeti.
Óńir basshysy eki mekteptiń ashylýyna oraı, qajetti quraldar alýǵa qarjylaı syılyq tabys etti.
«Memleket basshysy Qasym-Jomart Toqaev óziniń árbir tapsyrmasynda bilim salasyna erekshe kóńil bólýde. Jastardyń bilim alý múmkindigin álemdik ozyq deńgeıge teńestirý úshin bar múmkindikti jasaımyz», - dep atap ótti Ońdasyn Orazalın.
Aıshýaq aýyldyq okrýgi Begimbet aýylynda mádenıet úıi qoldanysqa berildi. 120 orynǵa arnalǵan nysannyń qurylysy ótken jyly bastalǵan bolatyn. Mádenı oshaq jergilikti turǵyndardyń ulttyq ónermen sýsyndaýyna, talantty jastardyń talabyn shyńdaýǵa múmkindik bermek.
«Halqymyzdyń qaıtalanbas ozyq mádenıetin zamanaýı úlgide qaıta túletý úshin biz mádenıetimizdi, mádenıet oshaqtaryn damytý jumystaryn qolǵa alýymyz kerek. Bolashaqta álemdi aýzyna qaratar naǵyz has talanttar osyndaı ortalardan shyǵaryna senimim mol», - dedi óńir basshysy.
Oblys ákimi «Nuraly» sharýa qojalyǵynyń jumysymen tanysty. Sharýa qojalyq qazirde 460 iri qara, 820 qoı baǵyp otyr. Bıyl memlekettik «Sybaǵa» baǵdarlamasy aıasynda 60 mln teńge nesıe alyp, Reseıden 105 bas aberdın-angýs tuqymdy analyq bas alyp kelgen. Sondaı-aq, munda 5000 basqa deıingi mal bordaqylaýǵa arnalǵan keshen salynyp jatyr. Investıtsııa kólemi – 300 mln teńgeni quraıtyn keshenniń qurylysy bıyl aıaqtalady. Ótken jyly mal soıý jáne et óńdeý tsehy iske qosylǵan. Investıtsııa kólemi – 147 mln teńge bolatyn kásiporyn jylyna 1000 tonna sıyr etin, 400 tonna qoı etin óndiredi.
Jumys sapary sońynda aımaq basshysy Ońdasyn Orazalın aýdan ákimi Baýyrjan Qanıevke aýdannyń áleýmettik- ekonomıkalyq jaǵdaıyn kóterýdi, qosymsha jumys kózderin ashyp, memlekettik baǵdarlamalar arqyly shaǵyn jáne orta kásipkerlikti damytyp, ınvestıtsııa tartýdy tapsyrdy.
