Aqtóbeniń Reseımen shekaralas aýdanynda shekteý sharasy kúsheıdi
AQTÓBE. Qazaqparat – Aqtóbeniń Mártók aýdanynda shekteý sharasy kúsheıtildi. Jol boıyndaǵy qyzmet kórsetý ortalyqtary azyq-túlikti tek terezesinen ǵana satady, dep habarlaıdy QazAqparat tilshisi.
Aqtóbeniń Mártók aýdany Reseımen shekarada ornalasqan. Mundaǵy «Jaısań» shekara beketi arqyly kún saıyn kóp adam ótedi. Ári karantındik statsıonar ornalasqan. Sońǵy aptada bul aýdandaǵy turǵyndar arasynda koronavırýs ınfektsııasyn juqtyrǵandar sany artyp, aýdandyq bas memlekettik sanıtar dárigeri jańa qaýly shyǵardy.
«Jaısań, Mártók, Táńirbergen, Saryjar aýyldyq okrýgteri «Aqtóbe-Orynbor» tasjolynyń boıynda ornalasqan. Barlyq qoǵamdyq tamaqtaný orny tapsyrysty dalaǵa shyǵaryp berýge mindetti. Jol boıyndaǵy janar-jaǵarmaı beketi, azyq-túlik jáne azyq-túlik emes dúkender tapsyrysty terezeden ǵana qabyldaıdy. Al senbi, jeksendi jáne meıram kúnderi azyq-túlik emes dúkender, qoǵamdyq tamaqtaný orny men bazarlar jumysyn toqtatady. Polıtsııa úı karantınindegi adamdardyń kóshege shyqpaýyn qadaǵalaýy tıis», - dep jazylǵan Mártók aýdandyq bas memlekettik sanıtar dáriger A.Sharafýtdınovanyń qaýlysynda.
Eske salsaq, qazir ınfektsııalyq statsıonarlarda 80-nen astam adam emdelip jatyr.
