Aqtóbeniń ozat oqýshylary Reseı men Ózbekstanda demalady
AQTÓBE. QazAqparat - Aqtóbe oblysynda 43 myńnan astam bala qatysqan merekelik sherý boldy. Oblys ákimi Berdibek Saparbaev úzdik oqýshylarǵa Tatarstan, Ózbekstan, Reseıdiń jazǵy lagerlerine joldama tapsyrdy, dep habarlaıdy QazAqparat tilshisi.
Aqtóbe oblysynyń 625 oqýshysy jaz boıy Tatarstan, Ózbekstan, Reseıdiń Orynbor oblysyndaǵy lagerge baryp, tynyǵady. Sonymen qatar, Shyǵys Qazaqstannyń jazǵy lagerlerine 400 joldama tapsyryldy. Máselen, Aqtóbe qalasynan - 268, Muǵaljar aýdanynan - 51, Shalqar aýdanynan 40 oqýshy úzdik oqyp, sportta jetistikke jetkeni úshin erekshe syıǵa ıe boldy.
«Memleket basshysy Nursultan Nazarbaev táýelsizdik alǵan kúnnen bastap Qazaqstannyń balalary qazirgi zaman talabyna saı bilim, tárbıe alsyn, ózderiniń sheteldegi qurdastarynan, qurbylarynan kem bolmasyn dep jaǵdaı jasap jatyr. «Rýhanı jańǵyrý» baǵdarlamasynyń negizgi saıasatynyń biri - balalarǵa jaqsy tárbıe, bilim berý»,- dedi oblys ákimi Berdibek Saparbaev.
Bárinen buryn Tatarstanǵa baratyn oqýshylar qýandy. Robototehnıkaǵa qyzyǵyp, jarys kezinde júldeli oryndarǵa ıe bolyp júrgen oqýshylar ózderi armandaǵan lagerge barady. Sebebi, olarǵa ІT tehnologııasy jaqsy damyǵan arnaıy lagerge joldama berildi.
«Men M.Qusaıynov atyndaǵy daryndy balalarǵa arnalǵan mektep-ınternatynda oqımyn. Biz baratyn lager robotehnıka salasyna baǵyttalǵan eken. Osy salaǵa qyzyǵýshylyq tanytyp otyrmyn. Ózim mektepte oblystyq, respýblıkalyq, halyqaralyq robototehnıka baıqaýlaryna qatysyp, birinshi oryn alyp júrmin. Pikirsaıysqa da qatysamyn. Bolashaqta ІT maman bolǵym keledi»,- dedi Bıbizeınet Tynyshtyqbaı.
Aıta keteıik, búgin Aqtóbe oblysy boıynsha 43 myńnan astam oqýshy, stýdent, pedagog merekelik sherýge shyqty. Qala mektepteriniń oqýshylary basty dańǵylmen júrip ótip, turǵyndarǵa erekshe kóńil-kúı syılady. Al «Baqytty bala» aktsııasy aıasynda múmkindigi shekteýli balalar oqıtyn úsh mektepke jáne qalanyń 7 bilim ordasyna tasymal úshin yńǵaıly kólik syıǵa berildi.
