Aqtóbeniń Oıyl aýdany «sary» aımaqqa ótti
Ótken táýlikte Aqtóbe oblysynda 25 adamnan koronavırýs ınfektsııasy anyqtaldy. Bári de Aqtóbe qalasynyń turǵyny. Vırýs juqtyrǵandardyń 16-sy aýyryp, dene qyzýy kóterilip, dáriger kómegine júgingen. Qazirgi kezde aýrýshańdyqtyń ósý deńgeıi 0,6% qurap otyr. Búginge deıin barlyǵy 4556 jaǵdaı tirkelse, onyń 93 paıyzǵa jýyǵy jazyldy. Oıyl aýdany boıynsha barlyǵy 80 adam vırýs juqtyrsa, onyń 29-y sımptomsyz. Búgin bul aýdanda shekteý sharasy kúsheıdi.
«Konferentsııa, kórme, forým, oıyn- saýyq, sporttyq, sondaı-aq adamdar kóp jınalatyn otbasylyq, saltanatty, merekelik sharalarǵa, estelik, as berý jáne basqa da basqosýǵa tyıym salynady. Oıyn-saýyq mekemeleriniń (karaoke, bılıard, kompıýterlik klýbtar, túngi jáne oıyn klýbtary, boýlıng- ortalyqtary, kalıan), býkmekerlik keńselerdiń jáne loto-klýbtardyń qyzmetterine shekteý qoıylǵan. Balabaqshalarda tek kezekshi top jumys isteıdi. Bilim berý mekemelerindegi ashana óz qyzmetin toqtatady», - dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.
Jańa Qaýlyǵa sáıkes balalardyń túzetý kabınetteri, balalar men eresekterdiń bilim berý ortalyqtarynda adam sany 15-ten aspaýy tıis. Al medıtsınalyq ortalyqtardyń, kabınetterdiń, stomatologııalardyń qyzmetine tek aldyn ala jazylýy kerek. Bank, halyqqa qyzmet kórsetý ortalyǵy, «Qazpochta» AQ bólimshesiniń jumys ýaqyty saǵat 09:00-den 18:00-ge deıin shekteldi. Dinı obektilerde ujymdyq is-sharalar ótpeıdi. Qoǵamdyq tamaqtaný ornynda adam sany 50-den aspaýy tıis.
