Aqtóbeniń ortalyq saıabaǵynda aǵashtar kesilip jatyr
AQTÓBE. QazAqparat - Aqtóbeniń ortalyq saıabaǵyndaǵy aǵashtar kesilip jatyr. Búgin belsendiler osyǵan baılanysty óz qarsylyǵyn bildirdi, dep habarlaıdy QazAqparat tilshisi.
Aqtóbeniń ortalyǵyndaǵy aǵashtar jappaı kesilip, qazir jańa saıabaq salý jumysy júrip jatyr. Buryn orman bolǵan bul aımaqqa jıektastar tóseldi. Muny kórgen aqtóbelik belsendiler aǵashty kesý kezindegi qatelikterdi tizip berdi.
«Aqtóbe qalasynda týyp-óstim. Qalanyń 12 yqshamaýdany mańyndaǵy aǵashtardy ákem egip, ósirgen bolatyn. Biz de sol kezde kómektesip júrdik. Qazir jasym 37-ge keldi. Orman bolǵan alqaptyń aǵashtary kesilip, bulaqtyń kózi jabylyp qalǵan. Qarap, júregim aýyryp tur. Bári qolmen istelip, buzyldy», - deıdi qala turǵyny Álibek Maǵaýın. Belsendiler qazir aǵash kesýdi toqtatyp, jańa egilgen aǵashtyń ýaqtyly sýarylýyn qadaǵalamaq. Saıabaqta jınalǵan toppen qalalyq ákimdik qyzmetkerleri men ekologtar kezdesti.
«Kógaldandyrý jumystary bir jylmen shektelmeıdi. Egilgen aǵashty qarap, baqylaımyz. Eger aǵash óspeı qalsa, merdiger qaıta egedi. Ótken jyly 12 845 aǵash otyrǵyzyldy, onyń 5 paıyzy qýrap qaldy. Merdiger onyń ornyn qaıta qalpyna keltiredi, ıaǵnı, qaıta aǵash egedi», - dedi Aqtóbe qalalyq turǵyn úı-kommýnaldyq sharýashylyq bóliminiń sektor meńgerýgisi Dastan Ájibaev.
Aqtóbelik ekologtar aǵashty kesý qalanyń ekologııasyna keri áserin tıgizetinin jasyrmady.
«Aǵash - qalanyń ókpesi. Ókinishke qaraı, joba ekologııa departamentiniń kelisiminsiz jasaldy. ıAǵnı, zań aıasynda ekologtardan ruqsat alý talaby qoıylmaǵan. Biz de BAQ arqyly bilip, qazir kelip, kórip otyrmyz. Qoǵamdyq tyńdaý bolyp, turǵyndardyń kelisimin alý kerek edi. Aǵash bolsa shań bolmaıdy, zııandy, ýly zattar azaıady. Aqtóbe - óndiristik aımaq ári aýasy las óńirlerdiń biri. Sondyqtan taldy kesýge bolmaıdy», - dedi Aqtóbe oblystyq ekologııa departamenti basshysynyń orynbasary Erbolat Qojyqov.
