Aqtóbeniń ortalyq bazary mańynda bir top adamnyń ustalýyna qatysty polıtsııa túsinik berdi
ASTANA. QazAqparat - Aqtóbe oblystyq ishki ister departamenti qalanyń ortalyq bazary mańynan bir top adamnyń ustalýyna oraı QazAqparat tilshisine túsinik berdi.
«102» pýltine Aqtóbe qalasynyń ortalyq bazary janynda jappaı tóbeles oryn alýy múmkin degen aqparat tústi. Shaqyrtý túsisimen taıaý mańdaǵy polıtsııa kezekshiligi birden oqıǵa ornyna jiberilip, jappaı tóbelestiń aldy alyndy», dep málim etti QazAqparat tilshisine departament baspasóz qyzmetinen.
Vedomstvo aqparatyna qaraǵanda, qabyldanǵan jedel sharalardyń arqasynda polıtsııa qyzmetkerleri 15 kúdikti adamdy ustady. Olardy qolǵa túsirý barysynda arnaıy quraldar men qarý qoldanylmaǵan.
«Kúdiktilerdi tintý barysynda olardan sýyq qarý jáne myltyq tabylǵan joq. Qazir barlyq tergeý amaldary júrgizilýde. Qalada atys boldy degen aqparat shyndyqqa janaspaıdy. Qasaqana jalǵan aqparat tartqany úshin jaýapkershilik kózdelgendigin esterińizge salamyz», - dedi Aqtóbe oblystyq ІІD-nen.
Aıta keterligi, ustalǵan azamattardyń ústinen Ákimshilik quqyq buzýshylyq týraly kodekstiń 449 baby boıynsha is qozǵalǵan. Atalǵan bapqa sáıkes, qoǵamdyq oryndarda zattardy ózgeshe tásilmen satyp alý, satý, aıyrbastaý nemese ıemdený maqsatynda kásipkerlik sýbektisi bolyp tabylmaıtyn adam jasaǵan, sondaı-aq bal ashý, qaıyrshylyq, seksýaldyq sıpatta qyzmetter kórsetý ne ózge de qyzmetter kórsetýdi kúshtep tańý maqsatynda tıisý, ıaǵnı mazalap ótinish bildirý jeke tulǵalarǵa bes aılyq eseptik kórsetkish mólsherinde aıyppul salýǵa ákep soǵady.
Sonymen qatar osy baptyń birinshi bóliginde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan áreketter on aılyq eseptik kórsetkish mólsherinde aıyppul salýǵa ne bes táýlikke deıingi merzimge ákimshilik qamaqqa alýǵa ákep soǵady.
