Aqtóbeniń ortalyǵynda eki mashına janyp ketti
AQTÓBE. QazAqparat - Sársenbi kúni Aqtóbe qalasynyń ortalyǵynda eki avtomashına órtendi, dep habarlaıdy QazAqparat tilshisi.
Tótenshe jaǵdaılar departamentiniń málimdeýinshe, saǵat 12:17-de Ábilqaıyr han dańǵylynda «ÝAZ» mashınasy órtke oranǵan. Oqıǵa ornyna 6 órt sóndirýshi jáne 1 arnaıy tehnıka, sondaı-aq, apattar medıtsınasy ortalyǵynyń dárigerleri shuǵyl attanǵan. Bir saǵattan soń órt sóndirildi. Abyroı bolǵanda, qurban bolǵandar joq, eshkim zardap shekpegen.
13:33-te Ábilqaıyr han dańǵylyndaǵy №69 úıdiń aýlasynda da mashına órtengen. Ony da órt sóndirý jáne apattyq-qutqarý jumystary qyzmetiniń qyzmetkerleri jyldam sóndirdi.
Oqys oqıǵalardyń sebepteri tekserilip jatyr. TJD ókilderi aqtóbelikterdi saq bolýǵa shaqyryp, avtokóliktiń motor bóligindegi elektr qondyrǵylaryn tekserýge keńes beredi.
