Aqtóbeniń mektebinde 2 myń asyq saqtaýly tur
AQTÓBE. QazAqparat - Aqtóbedegi №32 mektep-gımnazııada ulttyq buıymdar men aspaptardyń túpnusqasy saqtaýly tur. Mektep murajaıyna keli men kelisap, tas dıirmen, túrli áshekeıler men 2 myń asyq jınaqtalǵan, dep habarlaıdy QazAqparat tilshisi.
Aqtóbe qalasyndaǵy №32 mektep-gımnazııasy 1990 jyly Elbasy Nursultan Nazarbaevtyń qatysýymen ashylǵan. Bul - elimizdegi tuńǵysh mektep-gımnazııa. Tarıhy baı bilim ordasy búginde ulttyq ónerdi dáriptep, kúndelikti tutynǵan zattar men ulttyq áshekeılerdi, at ábzelderi men qarýdyń túpnusqasyn saqtaıtyn qundy orynǵa aınalǵan. Mektep ishindegi murajaı oqýshylar men ustazdardyń kómegimen jınaqtalǵan. Munda qajetti zattardy ata-analar da tegin berip, keıde qarjy salýǵa týra kelgen. Eńbek pen izdenistiń nátıjesinde oqýshylar ulttyq salt-dástúr men qundylyqtardy bilip ósip keledi. «Aqtóbe men mektep tarıhyna arnalǵan murajaıdaǵy ulttyq burysh qundy jádigerlerge toly. Muǵalimderdiń keıbiri aýylda kórgen, dalada jatqan jerinen jádigerlerdi taýyp alyp, murajaıǵa ákeldi. Máselen, bizde dıirmen, jip ıiretin urshyq ta bar. Beldik, qos ilgek sekildi áshekeı buıymdar da jetkilikti. Bizdegi qundy dúnıe ol - asyq. Naýryz merekesine oraı asyqqa suranys artty. Mektepter bir bóligin surap aldy. Bizde 2 myń asyq bar. Asyqty muǵalimder men oqýshylar jınady»,- dedi mektep-gımnazııa dırektorynyń ǵylymı-ádistemelik jónindegi orynbasary Gúlshara Mýsına.
Mektep-gımnazııa keń kólemde Naýryz merekesin atap ótti. Oqýshylar jarapazan aıtyp, muǵalimder qazan asyp, kóje pisirdi. Aǵash úı de tigildi. Al mekteptiń dene shynyqtyrý pániniń muǵalimderi Naýryz merekesine oraı balalarǵa asyq oınaýdyń qyr-syryn kórsetip, oqýshylar jarysqa tústi.
«Murajaıdy mektep dırektory Marııa Qurmanǵalıevanyń basshylyǵymen Bıbatpa Tájıdanova uıymdastyrdy. Meńgerýshi ári ustaz dúnıeden ótti, artynda óshpes iz qaldyrdy. Bizde sadaq ta bar. Jebe saqtaýly. Salmaǵy aýyr útik te bar. Bári ótken ǵasyrdan qalǵan túpnusqa jádigerler. Mektep ashylǵan kúni-aq murajaı jasaqtala bastady. Bizdegi erekshelik - etnografııalyq-tarıhı qundy jádigerlerde. Arnaıy jasalmady, qoldanystaǵy buıymdar sol kúı ákelindi. Arasynda áli de bolǵan uzaq ýaqyt qyzmet kórsetetin dıirmen, keli men kelisap bar»,- dedi Gúlshara Mýsına.
Murajaıda aǵash úıdiń úlgisi jasalǵan. Al shańyraqqa arnalǵan tireý ótken ǵasyrdyń jádigeri. Tireý ilgish retinde de paıdalanylǵan eken. Gúlshara Mýsınanyń aıtýynsha, murajaı ata-baba tarıhynan syr shertetin orynǵa aınalǵan.
