Aqtóbeniń kórkin keltiremiz degen sáýletshiler turǵyndardyń kúlkisine qaldy
AQTÓBE. QazAqparat - Aqtóbe qalasyndaǵy turǵyn úılerdiń qasbetin boıap, kórkin keltiremiz degen sáýletshiler kúlkige qaldy. 9 qabattaǵy úıdiń syrtyndaǵy boıaý geılerdiń jalaýyndaǵy 7 túspen sáıkes kelgen, dep habarlaıdy QazAqparat tilshisi.
Aqtóbe qalasynyń keskin-kelbeti jıi syrǵa ushyraıdy. Biri qurylysshylarǵa, biri sáýletshilerge kiná artty. Keıin kópqabatty turǵyn úılerdiń syrtyn boıaý, sýret salý jumysy bastaldy. Áli de sary tús jıi paıdalanylady. Al túrli tústi tańdaǵan qala keńesiniń sheshimi turǵyndardyń synyna ushyrady.
«Adamdardyń pikirine shekteý qoıa almaımyz. Ár adamnyń oıy ártúrli. Biz úshin kempirqosaqtyń 7 túsi ispetti. Ár tús adamǵa kóńil kúı beredi. Geıler týraly oılap, «bul tústi qoldanbaý kerek eken» dep biz ózimizdi shekteı almaımyz. Bar shyǵar, biraq ol Eýropa elderindegi adamdar arasynda ǵana kezdesedi dep oılaımyz. Bizdiń mentalıtetimizde mundaı joq. Al úıdiń qasbetin basqa túske boıamaımyz»,- dedi Aqtóbe qalasynyń sáýlet jáne qala qurylysy bóliminiń basshysy Tanat Shegebaev.
Qalanyń ortasyndaǵy, adam kóp shoǵyrlanatyn jerdegi turǵyn úıdiń syrty áli boıalyp jatyr. Qalalyq ákimdik bul jumysty qarjynyń bóliný retine qaraı jalǵastyrmaq.
«Aqtóbeniń ortalyǵyndaǵy turǵyn úıler Keńes úkimeti kezinde salynǵan. Sur ári óńsiz. Sondyqtan jańa sáýlet talaptaryna saı qaıta baıaýdy jón kórdik. Qansha úıdi boıap, qansha qarjy jumsaıtynymyzdy aıta almaımyz. Qarjy tabylsa, úılerdi boıaý jumystaryn jalǵastyra beremiz. Ortalyqtaǵy turǵyn úı mańy halyq kóp shoǵyrlanatyn, qonaqtar qydyratyn jer. Úılerdiń bárine reń, tús berý kerek bolyp, boıaldy. Ári Elbasy Nursultan Nazarbaev Aqtóbege sapary kezinde bir tıpti úılerge syn aıtqan bolatyn. Úıdiń qasbetin áleýmettik jelilerge salyp, qala qurylys keńesinde talqylandy. Keńeske qala ákimi Іlııas Ispanov jáne tájirıbeli sáýletshiler múshe»,- dedi T. Shegebaev.
