Aqtóbeniń Qobda aýylynda 15 úı, saýyqtyrý ortalyǵy men kafe sý astynda qaldy

AQTÓBE. QazAqparat - Aqtóbe oblysynyń Qobda aýdanyndaǵy jaǵdaı óńir basshylyǵynyń baqylaýynda, dep habarlaıdy QazAqparat

13 naýryzda Qobda aýdanynda qardyń qarqyndy erýi jáne dalalyqta erigen qar sýy saldarynan Qobda aýylynda 15 úı, 28 aýla aýmaǵy, deneshynyqtyrý-saýyqtyrý kesheniniń ǵımaraty, bir kafe sý astynda qaldy.

Turǵyndar qaýipsiz jerge - evakýatsııalyq pýnktke kóshirildi.

Qazirgi ýaqytta úılerdiń aýlalaryn aralaý júrgizilýde, qapshyqtardy tóseý boıynsha sharalar qabyldanýda. 6 myń m3 astam erigen qar sýy soryldy.

Sý tasqynyna qarsy is-sharalarǵa 35 tehnıka, 123 adam jumyldyryldy.

Qobda aýdany Egindibulaq aýylyna da erigen qar sýy kirdi. Turǵyn úıler men jeke qosalqy sharýashylyqtarǵa qaýip joq.

Sý tasqyny kezeńi bastalǵannan beri Aqtóbe qalasy men aýdandardan 1 514 ótinim qabyldanyp, barlyǵy pysyqtaldy.

Búgingi tańda oblys boıynsha barlyǵy 181 myń m3 astam erigen qar sýy soryldy.

26,1 shaqyrym aryq tazartyldy, 4 972 m3 ınertti materıal ákelindi, 3 320 dana qap tóseldi, eldimekenderden 524,9 myń m3 astam qar shyǵaryldy.

Qosymsha 138 assenızator tartyldy.

Jergilikti jerlerde 142 tehnıka, 20 mobıldi brıgada jumys isteıdi, 650 adam jumyldyryldy.

Qazirgi ýaqytta Aqtóbe qalasy boıynsha sý basqan kósheler joq. Baqylaýǵa alynǵan 4 ýchaskede erigen qar sýynyń túsýine qaraı merzimdi jumystar júzege asyrylady.