Aqtóbeniń Qobda aýdanynda birneshe úı men sport mektebine sý kirdi

AQTÓBE. QazAqparat - Aqtóbeniń Qobda aýdanynyń ortalyǵyna sý kirdi. Birneshe úı turǵyndary evakýatsııalandy, dep habarlaıdy QazAqparat tilshisi.

Keshe saǵat 17:50-de Qobda aýdanyndaǵy balalar jáne jasóspirimder sport mektebi mańyna qar sýy jınalǵany týraly aqparat taraǵan. Oqıǵa ornyna arnaıy tehnıka jiberilip, qum toly qap jetkizildi. Alaıda sýdy toqtatý múmkin bolmady.
«Oqıǵa ornynda oblystyq TJD shtab músheleri men oblys ákimdiginiń ókilderi bardy. Saǵat 20:17-de qar sýynyń aǵyny kúsheıip, 6 úıdi sý basty. Bul úılerdiń turǵyndary evakýatsııalandy. Sonymen birge dene shynyqtyrý -saýyqtyrý ortalyǵyn sý basty. Qar sýy Qobda aýdanynyń Egindibulaq aýylyna kirdi. Degenmen úıler men sharýashylyqtarǵa qaýip tónip turǵan joq. Jergilikti ákimdik pen tótenshe jaǵdaılar departamentiniń ótinimine sáıkes Qobda aýylyn tasqyn sýdan qorǵaý jáne turǵyndardyń qaýipsizdigin qamtamasyz etý úshin respýblıkalyq mańyzy bar «Samara-Shymkent» tasjolynyń 613 shaqyrymyndaǵy ýchaskesin qazý týraly sheshim qabyldandy. Jol bóligin qazý jumystary bastaldy. Óńirde sý tasqyny qaýpi seıilgennen keıin jol qalpyna keltiriledi. Qazirgi kezde Shubarqudyq-Oıyl-Qobda-Sol-Iletsk baǵytyndaǵy Qobda-Jırenqopa aýylynyń arasy jabyq»,- dep habarlady Aqtóbe oblysy ákiminiń baspasóz qyzmeti.
Eske salsaq, Aqtóbede Baıǵanın aýdanynda joldy sý shaıdy.

Keıin Oıyl aýdanynda joldy sý basty.