Aqtóbeniń keıbir gaz quıý stansalary talonǵa kóshti
AQTÓBE. QazAqparat – Aqtóbede suıytylǵan gaz tapshy. Bul tapsyrys berýshi kásipkerlerdiń kinási, dep habarlaıdy QazAqparat tilshisi.
Aqtóbe oblysynda 180-nen astam suıytylǵan gaz quıý beketi bar. Qyrkúıek aıyna oblystyq energetıka departamenti 10 836 tonna gaz alýǵa tapsyrys berdi. Al jetkizýshiler Atyraýdan alatyn 1 myń tonnasyn alýdan bas tartty. Olar júk poıyzymen jetkizý kezinde baǵanyń kóteriletinin aıtyp, shyǵynyn eseptegen.
«Aqtóbe oblysynyń negizgi suranysy 13 myń tonnadan asty. Sondyqtan bizge qajetti gaz kólimin ulǵaıtý úshin mınıstrlikke únemi suranys berip otyramyz. Taǵy bir sebebi – Jańajol gaz óńdeý zaýytynda josparly jóndeý jumysy júrgizildi. Sáıkesinshe elimizde suıytylǵan gaz shyǵarý kólemi azaıdy», - dedi oblystyq Energetıka jáne turǵyn-úı kommýnaldyq sharýashylyǵy basqarmasynyń basshysy Aıbek Qaıyr.
Aıta keteıik, zerdeleý kezinde 180 gaz quıý beketiniń 119-da gaz bar. Ol 66 paıyzdy quraıdy. Onyń 22 paıyzy gazdy talonmen satyp jatyr. Aldaǵy ýaqytta mundaı tapshylyq sezilmeýi tıis. Sebebi Aqtóbe oblysy qazan aıyna 12 082 tonnaǵa tapsyrys berdi. Baǵa turaqty. 1 lıtri 52-54 teńge.
