Aqtóbeniń kásipkerleri aýyl joldaryn jóndep beredi
AQTÓBE. QazAqparat - Aqtóbede iri tasjol boıyndaǵy aýylǵa aparar joldardy kásipkerler óz qarjysyna salady. Keıin 3-5 jyl ishinde memleket qarjyny túgel óteıdi, dep habarlaıdy QazAqparat tilshisi.
Aqtóbe oblysynda jolǵa bólingen qarjy on ese artty. Eń mańyzdysy - Aqtóbe-Atyraý tasjoly. Qazirgi kezde jol qurylysyna qajetti materıaldardy jetkizý jumystary júrip jatyr. Jergilikti bılik jol jóndeý jumystary kezinde memlekettik-jekeshelik seriktestik ádisin paıdalanýdy jón kórip otyr. Sebebi, úlken tasjoldy jóndeý kezinde aýylǵa barar shaǵyn jol eskerýsiz qalyp, turǵyndar jıi shaǵym aıtady.
«Úlken joldy salǵan kezde shaǵyn joldar nazardan tys qalyp jatady. Sondyqtan bıyl qurylys kompanııalaryna bes jobany usyndyq. Olar jobalyq-smetalyq qujat daıyndap, joldy salady. Biz 3-5 jyl aralyǵynda qarjyny túgel qaıtaramyz. Al qurylys kompanııasy bankten nesıe alsa, onyń paıyzdyq ústemeaqysyn da memleket beredi. Bul biz úshin tıimdi»,- dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.
Aıta keteıik, Aqtóbede memlekettik-jekeshelik seriktestik aıasynda 5 joba daıyn. Quny - 11 mıllıard teńge.
«Temir aýdanynyń Altyqarasý aýylyna barar jol, Baıǵanın aýdanynyń ortalyǵy Qaraýylkeldide Asaý Baraq kóshesi, Oıyldaǵy Aqyrap aýylynyń Bolashaq kóshesi jóndeledi. Sonymen qatar, Hromtaý qalasyndaǵy mektepke jáne balabaqshaǵa barar jolǵa ortasha jóndeý júrgiziledi»,- dedi Aıazbaı Osmanǵalıev.
