Aqtóbeniń irgesinde jańa aýyl boı kóteredi
AQTÓBE. QazAqparat - Aqtóbeniń Alǵa aýdanynda Bastaý aýyly salynady. Aqtóbe aglomıratsııasy aıasynda munda 2 myńnan astam adamǵa jer telimi beriledi, dep habarlaıdy QazAqparat tilshisi.
Aqtóbe oblysy, Alǵa aýdanynyń ákimi Naǵymjan Aldııarov búgin óńirlik kommýnıkatsııalar qyzmetinde óz basqaryp otyrǵan aımaqtyń damýy týraly aıtyp berdi. Oblys ortalyǵyna jaqyn ornalasqan aýdannyń birneshe aýyly aglomıratsııa aıasynda qaıta jańǵyrady.Máselen, Marjanbulaqta Bastaý aýyly salynady.
«Aýylǵa jańa turǵyn úıler salynyp, áleýmettik nysandar boı kóteredi. Mádenıet úıi, emhana, balalar alańy salynady. Bizdiń aýdandaǵy Marjanbulaq, Úshqudyq, Saryqobda aýyldary Aqtóbe aglomıratsııasy aıasynda damıdy. Bekitilgen josparǵa sáıkes jer telimderin daıyndap jatyrmyz. Barlyǵy 5 myń jer telimi bólinedi», - dedi Alǵa aýdanynyń ákimi Naǵymjan Aldııaov.
Aıta keteıik, bıyl Aqtóbe-Atyraý tasjolynyń qurylysy kezinde Alǵa aýdanyna aparat jol jóndeledi. Sonymen qatar, aýdanda burynǵy hımııa zaýytynyń ornyn tazartylyp, jańa kólik-logıstıka ortalyǵy nemese ındýstrıaldy aımaq salynady.
«Burynǵy hımııa zaýytynyń ornyn tazartýǵa 8 mıllıard teńge qarjy qajet. Barlyǵy 300 gektar jer tazartylyp, tegistelýi qajet. Bul jerdiń jobalyq-smetalyq qujaty ázirlendi. Biz respýblıkalyq bıýdjetten qarjy bólingenin kútip otyrmyz»,- dedi Naǵymjan Aldııarov.
Eske salsaq, burynǵy hımııa zaýytynyń aýmaǵynda 730 myń tonnadan astam óndiristik, hımııalyq qaldyq bar. Zaýyt ornyn zalalsyzdandyrýǵa qajetti qujat QR Energetıka mınıstrliginde jatyr.
