Aqtóbeniń damý baǵdary aıqyndaldy - Úkimet
ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev Aqtóbe aglomeratsııasyn damytý baǵytyn tıimdi júzege asyrýdy tapsyrdy, dep habarlaıdy QazAqparat.
«Almaty, Astana jáne Shymkent aglomeratsııalarymen qatar Aqtóbe aglomeratsııasyn damytý shemasy ázirlendi. Aqtóbe aglomeratsııasyna Aqtóbe qalasy jáne oblystyń 6 aýdanynyń eldi mekenderi kirdi (Alǵa, Qarǵaly, Qobda, Mártók, Muǵaljar jáne Hromtaý). Aglomeratsııalaý protsesterin damytý úshin aglomeratsııa ózegi Aqtóbe qalasynda jáne halyqtyń tartylý ortalyqtarynda halyq sanyn ulǵaıtý qajet. Osy oraıla shyǵys baǵytta - Hromtaý qalasy; batysta - Qobda aýyly, soltústik batysta - Mártók aýyly, ońtústik baǵytta - Alǵa jáne Qandyaǵash qalalary. 2030 jylǵa qaraı halyq sanynyń 1,5 ese artýy kútilýde. Jobada aýmaqtyń resýrstyq, mıneraldyq shıkizat jáne óndiristik áleýetin eskere otyryp aglomeratsııanyń óndirgish kúshterin perspektıvaly damytý usynyldy. 2030 jylǵa qaraı joǵary tehnologııalyq salalar, ınnovatsııa, ǵylym, saýda jáne qyzmet kórsetý salalary damıtyn bolady», - dedi Investıtsııalar jáne damý mınıstri Jeńis Qasymbek.
Onyń sózine qaraǵanda, óńirde qurylys, taý-ken metallýrgııa, mashına jasaý jáne medıtsına klasterleri, munaı óńdeý jáne temirjol ónimderin shyǵarý boıynsha klasterler qarqyndy damıtyn bolady. Aqtóbe qalasynda ındýstrııalyq aımaqty damytý, Alǵa qalasynda, Muǵaljar jáne Hromtaý aýdandarynda ındýstrııalyq aımaqtardy qurý - ınvestıtsııany 2,3 ese arttyrý múmkindigin beredi.
Budan bólek, agroónerkásiptik keshendi ártaraptandyrý, tehnologııalyq qaıta jaraqtandyrý jáne klasterlik damytý 2030 jylǵa qaraı asyl tuqymdy iri qara mal úlesin 15%-ǵa arttyrý, et óńdeý úlesin 15%-ǵa (34%-dan 49%-ǵa deıin) jáne sút óńdeý úlesin 14%-ǵa (33%-dan 47%-ǵa deıin) ulǵaıtý (et, sút jáne jemis-kókónis klasterlerin, ındýstrııalyq-agrarlyq aımaqty damytý) mal sharýashylyǵynyń jalpy ónim kólemin 3 ese (60,4 mlrd. teńgeden 180 mlrd.teńgege deıin) arttyrýǵa yqpal etedi.
«Halyqtyń mobıldigin arttyrý, júkterdiń erkin qozǵalýyn qamtamasyz etý úshin: Aqtóbe qalasynyń 63 shaqyrym aınalma avtomobıl jolyn salý (Úlken Ońtústik jáne Batys) salý; «Qandyaǵash - Maqat» ýchaskesinde «Ortalyq - Batys» dálizin, «Aqtóbe - Atyraý - RF shekarasy (Astrahanǵa)» («Aqtóbe - Qandyaǵash» ýchaskesinde), «Aqtóbe - RF shekarasy (Orskige)» respýblıkalyq mańyzy bar avtojoldardy rekonstrýktsııalaý kózdelip otyr. Oblystyq mańyzy bar 5 avtojoldy jáne aýdandyq mańyzy bar 20 joldy kúrdeli jóndeý josparlanýda», - dep naqtylady mınıstr.
Óz kezeginde Úkimet basshysy Baqytjan Saǵyntaev Investıtsııalar jáne damý mınıstri Jeńis Qasymbek pen Aqtóbe oblysynyń ákimi Berdibek Saparbaevqa atalǵan damytý shemasyn tıimdi júzege asyrýdy qamtasyz etý kerektigin tapsyrdy.
