Aqtóbeniń bir aýdany karantınge jabylýy múmkin
AQTÓBE. QazAqparat – Aqtóbe oblysynyń Shalqar qalasy karantınge jabylýy múmkin. Munda bir aptada 19 adam vırýs juqtyrǵan, dep habarlaıdy QazAqparat tilshisi.
Sońǵy táýlikte Aqtóbede 4 adamnan koronavırýs ınfektsııasy anyqtaldy. Olardyń úsheýi Aqtóbe qalasy bolsa, bireýi Shalqar aýdanynyń ortalyǵynan tirkeldi.
«Barlyǵy 367 naýqas koronavırýs ınfektsııasyn juqtyrsa, 281-iúılerine shyǵaryldy. Em qabyldap jatqan 7 adam jansaqtaý bóliminde bolsa, ekeýi jasandy tynys alý apparatyna qosyldy. Aýrý tek oblys ortalyǵynda emes, aýdan ortalyqtarynda da tirkeldi. Shalqar aýdanynda 19 adam indet juqtyrǵan. Onyń 8-i bala. Bul aýdandaǵy naýqastardyń kóbi oblys ortalyǵyna jetkizildi. Bireýi sanavıatsııamen tasymaldandy. Dertke shaldyqqan tek 6 adam sol Shalqar qalasynda qaldy», - dedi oblystyq densaýlyq saqtaý basqarmasynyń basshysy Áset Qalıev.
Aıta keteıik, arnaıy shtab aýdandardaǵy jaǵdaıdy baqylap otyr. M.Ospanov atyndaǵy Batys Qazaqstan memlekettik medıtsına ýnıversıtetiniń mamandarynan qurylǵan top naýqastardy emdeý, tasymaldaý týraly sheshim qabyldaıdy. Telemedıtsına baılanysy ornaǵan. Oblys ortalyǵyndaǵy dárigerler baryp, keńes berdi.
«Aqtóbe qalasynda karantın alyndy, biraq shekteý qaldy. Bizdi Shalqar qalasy alańdatyp otyr. 27 mamyrdan bastap munda 19 jaıǵaı tirkeldi. Birinshi jaǵdaıda Aqtóbe qalasynyń turǵyny aýylǵa demalysqa baryp, indet taratqan. Sol úıdiń adamdary koronavırýs juqtyrdy. Bir otbasynan 6 adam aýrýhanaǵa tústi. Munda 18 paıyz kórsetip tur. Monıtorıng jasap, karantınge jabý týraly qaýlyny búgin shyǵarýymyz múmkin», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
