Aqtóbeniń bas sanıtar dárigeri óńirdegi vırýs juqtyrýdyń sharyqtaý shegin boljady

AQTÓBE. QazAqparat – Tamyz aıynda Aqtóbede 6 912 adamnan koronavırýs ınfektsııasy anyqtaldy. Aqtóbeniń bas sanıtar dárigeri Nursulý Berkimbaeva óńirdegi vırýs juqtyrýdyń sharyqtaý shegin boljady, dep habarlaıdy QazAqparat tilshisi.

Aqtóbe oblysynda bir táýlikte 426 adamnan koronavırýs ınfektsııasy anyqtaldy. Vırýs juqtyrǵandardyń 376-sy derttiń sımptomdy túrine shaldyqqan. Qazirgi kezde oblys boıynsha 1 268 adam aýrýhanada jatyr. Onyń 97-si jansaqtaý bóliminde.

«Aqtóbedegi ınfektsııalyq statsıonarlardyń barlyǵynda adam kóp. Qazirgi kezde kereýet júktemesi 68,5 paıyzdy qurady. Al jansaqtaý bóliminiń 45,8 paıyzda naýqastar em qabyldap jatyr. Balalar arasynda 368 derek tirkeldi. Vırýs juqtyrǵandardyń 17-i statsıonarda. Al koronavırýs ınfektsııasyna shaldyqqan 186 júkti áıeldiń 160-y dárigerler baqylaýyna alynǵan. Olar da em qabyldap jatyr», - dedi oblystyq densaýlyq saqtaý basqarmasy bóliminiń bas mamany Ásııa Tirijanova.

Aqtóbe oblysyna barlyǵy 506 myńnan astam vaktsına jetkizilgen. Qazirgi kezde 265 myńnan astamy eki komponentin de qabyldady. Óńirge taǵy 20 myń doza qytaılyq vaktsına jetkizildi.

«Maýsym aıynda 776, shildede 4757, al tamyz aıynda 6912 adamnan koronavırýs ınfektsııasy anyqtaldy. Osyǵan qarap juqtyrýdyń sharyqtaý shegi tamyz aıyna kelip turǵanyn kóremiz. Tamyz aıynyń sońy men qyrkúıek aıynyń basynda azaıa túsedi degen boljam bar», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.