Aqtóbeniń bas memlekettik sanıtarııalyq dárigeri vaktsına qabyldady
AQTÓBE. QazAqparat - Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva vaktsına qabyldady, dep habarlaıdy QazAqparat tilshisi.
Departament basshysy Nursulý Berkimbaeva №6 Aqtóbe qalalyq emhanaǵa baryp, aldymen óz densaýlyǵyn teksertti. Qan qysymy men dene qyzýy ólshendi.
«Men ekpe qabyldadym. Jaǵdaıym jaqsy. Shaǵymym joq. Týra 21 kúnnen keıin, ıaǵnı, 23 aqpanda ekpeniń ekinshi komponentin qabyldaımyn. Óńirde ımmýndaý keshe bastaldy. Birinshi kezeń boıynsha dárigerlermen qatar ózim sekildi epıdemıologtar vaktsına qabyldap jatyr. Aqtóbe oblysyna barlyǵy 1 myń doza jetkizildi», - dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
Aqtóbeniń bas memlekettik sanıtarııalyq dárigeri «jasyl» aımaqtaǵy Aqtóbe jurtyna áli de betperde taǵyp, antısektık qoldanýdy, araqashyqtyqty saqtaýdy eskertti.
