Aqtóbeniń bas ımamy men meshit qyzmetkeri bitimge keldi
AQTÓBE. QazAqparat - Qazaqstan musylmandary dinı basqarmasyna qarasty «Zeket» qorynyń zańdy ókili Dámen Ómirbek pen «Nur Ǵasyr» meshitiniń bas ımamy Tólebı Ospan bitimge keldi, dep habarlaıdy QazAqparat tilshisi.
«Zeket» qorynyń zańdy ókili Dámen Ómirbek meshit ishindegi qysym men jalaqy tóleýdegi zańsyzdyqty aıtyp, sotqa aryz túsirgen bolatyn. Búgin azamattyq is bitimmen aıaqtaldy.
«Talapker Dámen Ómirbek pen jaýapker Tólebı Ospan ózara kelisimge kelip, birin-biri keshirip, aldaǵy ýaqytta moraldyq-materıaldyq talap qoımaıdy. Talap qoıýshy D.Ómirbek jaýapkerge qatysty barlyq talabynan bas tartady. Sot taraptarǵa osy sharttaǵy kelisimdi bekite otyryp, zańǵa sáıkes istiń qysqartylatyn eskertti. Eki tarap ta osy is boıynsha ekinshi ret sotqa júgine almaıdy»,- dedi №2 qalalyq sottyń sýdıasy Aıgúl Abdýllına.
Sot otyrysyna talapker men jaýapkerdiń qorǵaýshylary ǵana qatysty. Dámen Ómirbektiń qorǵaýshysy onyń otadan keıin em qabyldap jatqanyn aıtty. Dámek Ómirbek óz aryzynda aryzdy sottan qaıtaryp alatynyn, bas ımam Tólebı Ospannan eshqandaı da moraldyq-materıaldyq shyǵyn talap etpeıtinin jetkizgen.
