Aqtóbeniń bas dárigeri turǵyndardy vaktsına saldyrýǵa shaqyrdy
AQTÓBE. QazAqparat – Aqtóbe oblystyq densaýlyq saqtaý basqarmasynyń basshysy Rústem Isaev vaktsınanyń tórtinshi komponentin saldyrdy. Ol aqtóbelikterdi ımmýndaý sharasyna qatysýǵa shaqyrdy, dep habarlaıdy QazAqparat tilshisi.
Qazaqstan boıynsha árbir 6 aı saıyn koronavırýs ınfektsııasyna qarsy vaktsına saldyrýǵa ruqsat berildi. Ásirese medıtsına qyzmetkerleri men pedagogtar, áleýmettik ortalyq qyzmetkerleri, kúshtik qurylym men jasy 50-den asqan adamdar ımmýndaý is-sharasyna qatysýy tıis.
«Qazirgi kezde oblysta turǵyndardyń 81,2% vaktsınanyń birinshi komponentin saldyrdy. Al 78,4% eki komponentin de qabyldady. Sonymen birge 180 myńnan astam adam revaktsınatsııadan ótti», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.
Aqtóbede QazVac , Pfizer jáne Sinopharm vaktsınalary qoljetimdi. Óńirde barlyǵy 120 myńnan astam doza bar. Qazirgi kezde emhanalarda ekpe kabınetteri jumys istep tur. Búgin oblystyq densaýlyq saqtaý basqarmasynyń basshysy Rústem Isaev №4 emhanaǵa baryp, ımmýndaý is-sharasyna qatysty.
«Vaktsınanyń birinshi jáne ekinshi komponenti Spýtnık V boldy. 2021 jyldyń qarasha aıynda Sinopharm ekpesin qabyldadym. Al búgin Pfizer saldyrdym. Jańa qaýly boıynsha aldymen aq halattylar vaktsınanyń tórtinshi komponentin saldyrady. Qazirgi kezde bizdegi ınfektsııalyq aýrýhanada 7 adam em qabyldap jatyr. Bul koronavırýs ınfektsııasynyń áli de bar ekenin kórsetedi. Sondyqtan saqtanyp, vaktsına saldyrýǵa shaqyramyn», - dedi oblystyq densaýlyq saqtaý basqarmasynyń basshysy Rústem Isaev.
Aıta keteıik, obylsta 14 myńnan astam jasóspirim Pfizer vaktsınasynyń birinshi komponentin saldyrdy. Al 12 myńnan astamy eki komponentin de qabyldady.