Aqtóbeniń bas dárigeri perzenthanadaǵy ana óliminiń sebebin aıtyp berdi
AQTÓBE. QazAqparat - Aqtóbe oblystyq aýrýhanasyndaǵy perzenthanada jas ana qaıtys bolyp, birneshe dáriger jazalandy. Búgin oblystyń bas dárigeri ana óliminiń negizgi sebebin aıtyp berdi, dep habarlaıdy QazAqparat tilshisi.
Jyl ótken saıyn Aqtóbede ana men bala óliminiń kórsetkishi tómendep kele jatqanymen, qańtar aıynda oblystyq medıtsınalyq ortalyq perzenthanasynda 28 jastaǵy kelinshek kóz jumdy. Aýrýhanada bas dárigerdiń orynbasary jazalanyp, onyń qyzmeti tómendetildi. Al búgin oblystyń óńirlik kommýnıkatsııalyq qyzmetinde densaýlyq saqtaý basqarmasynyń basshysy Áset Qalıev ólimniń negizgi sebebin aıtyp berdi.
«Jas ana aýrýhanaǵa túsken kezde jaǵdaıy birqalypty boldy. Al bosanǵan soń jaǵdaıy kúrt nasharlap ketken. Bosanǵan kezde jas ananyń aǵzasy álsirep, ınfektsııa kúsh alyp, asqynyp ketýi múmkin. Bul jerde dárigerler dıagnozdy kesh qoıyp, kesh ota jasady. Kinási osy. Eger der kezinde ota jasalsa, jas ananyń ómirin saqtap qalýǵa múmkindik bolar edi. Qazirgi kezde sábı jaqyndaryna berildi»,- dedi Aqtóbe oblystyq densaýlyq saqtaý basqarmasynyń basshysy Áset Qalıev.
Aıta keteıik, jas ana óliminen soń aýrý tarıhy talqylanyp, júrgizilgen em qaraldy. Tekserý nátıjesi boıynsha dárigerlerdiń kemshiligi bar ekeni anyqtaldy.
«Jas anada septıkalyq shok bolǵan. Іrińdi toksıkalyq ınfektsııaǵa baılanysty jaǵdaıy kúrt nasharlap ketti. Ólimniń sebebi de osy», - dedi Áset Qalıev.
Foto: ult.kz
