Aqtóbeniń bas dárigeri hıdjamaǵa qarsylyq bildirdi
AQTÓBE. QazAqparat - Sońǵy kezderi adamdar qan aldyryp, din ókilderi hıdjama jasap júr. Bul salanyń baqylaýsyz qalǵanyn aıtqan Aqtóbe oblysynyń bas dárigeri Áset Qalıev sanıtarlyq talap saqtalmasa, aryz jazýdy usyndy, dep habarlaıdy QazAqparat tilshisi.
Aqtóbede adamdardyń úıine baryp, hıdjama jasaıtyn din ókilderi kóbeıdi. Bul jarnamany kez kelgen áleýmettik jeliden kórýge bolady. Quny 5 myń teńge bolatyn qyzmet túri medıtsınada dáleldenbegen, sanıtarlyq talap saqtalmaǵan soń qaýipti. Aqtóbe oblystyq densaýlyq saqtaý basqamasynyń basshysy Áset Qalıev úı jaǵdaıynda qan aldyrýǵa qarsylyq bildirip, turǵyndardyń aryz-shaǵymy túspeı tekserý bolmaıtynyn jetkizdi.
«Aqtóbe oblystyq densaýlyq saqtaý basqarmasy lıtsenzııasy bar medıtsınalyq emdeý mekemesimen jumys isteıdi. Qazirgi kezde hıdjama tekserilmeıdi. Eshqandaı ǵylymı dáleli joq, emniń tıimdiligi naqtylanbaǵan. Sondyqtan men turǵyndarǵa hıdjama jasatpaýǵa keńes beremin. Biraq bul qazir jeke bızneske aınalǵan. Aryz-shaǵym bolmasa, baryp, tekserý júrgize almaımyz. Eger «em júrgiziledi, sanıtarlyq norma saqtalmaǵan» dep aıtylsa, oblystyq qoǵamdyq densaýlyq saqtaý basqarmasyna habar berýge bolady. Basqarma prokýratýradan ruqsat surap, tekserý júrgize alady»,- dedi Áset Qalıev.
Óńirde hıdjamadan soń aýrýy asqynǵan, em alǵan adam tirkelmedi. Biraq dárigerler bul óte qaýipti em dep otyr.
«Qanǵa, ashyq jaraǵa ınfektsııa tez juǵady. Tipti, adam emdelemin dep V, S gepatıtterine shaldyǵýy múmkin. Qan alǵan kezde travmatıkalyq shok bolýy da yqtımal. Ol jerde sanıtarlyq norma saqtalmasa, jaǵdaı ońaı bolmaıdy. Qan aldyratyn orynda reanımatsııalyq jabdyqtardyń bári bolýy tıis»,- dep eskertti Áset Qalıev.
Foto: smotry-film.ru
