Aqtóbeniń avtobýs órtengen trassasy qaýipti aımaqqa jatady - TJD

Qys bastalǵannan Aqtóbe oblysynyń avtojoldarynda 15 apattyq-qutqarý jumystary júrgizildi. Sonymen qatar mal baǵyp júrip adasyp ketken adamdar da izdestirildi. Barlyǵy 147 adam qutqarylyp, jylytý beketterine jetkizilgen. Aqtóbedegi tótenshe jaǵdaılar qyzmeti Samara-Shymkent tasjoly eń qaýipti aımaq ekenin aıtyp otyr.

«Samara-Shymkent tasjolynyń Yrǵyz aýdany terrıtorııasy qaýipti aımaq sanalady. Bul jerde óte qatty jel bolady. Elimizdiń ońtústiginen kele jatqan júk kólikteri, avtobýstar buǵan daıyn bolmaı shyǵady. Olar jazǵy dızeldi otyn paıdalanady. Túngi aıazda Aqtóbe terrıtorııasyna ótip, jolda toqtap qalǵan jaǵdaılar tirkeldi. Sol kezde avtobýstardyń jolaýshylaryn jylytý beketterine aparýǵa týra keledi. Qazir «QazAvtoJol» mekemesi jedel qımyldap, qatty aıazda avtojolda júrýge shekteý qoıady», - dedi Aqtóbe oblystyq Tótenshe jaǵdaılar departamenti bastyǵynyń orynbasary Qaırat Qasym.

Eske salaıyq, Aqtóbe oblysy ákimdiginde ótken keńeste TJD bastyǵy Baýyrjan Syzdyqov qardy ustap qalatyn qalqandar tapshy ekenin aıtqan bolatyn. Sonymen qatar jolaýshylardyń qaýipsizdigin qamtamasyz etý úshin avtobýstarǵa órt sóndirý qurylǵylaryn ornatý usynyldy.

«Respýblıkalyq, oblystyq mańyzy bar, aýdandardaǵy joldarda qar toqtatý qurylǵylary az. Respýblıkalyq tasjoldyń 8 paıyzynda, al oblystyq joldardyń bar bolǵany 2,5 paıyzynda qardy toqtatý qurylǵysy bar. Ári jolaýshylar tasymaldaıtyn avtobýstarǵa órt sóndirý qurylǵylaryn qondyrý kerek. 2016-2017 jyldary 12 jolaýshylar kóligi janyp ketken. Sońǵy jaǵdaı qaıǵyly aıaqtaldy. Reseı tarapy qazir avtobýstarǵa órt sóndirý júıesin ornatyp jatyr»,- dedi ol.

Aıta keteıik, qys aılarynda joldaǵy qaýipsizdik úshin 190 mıllıon teńgeden astam qarjy bólindi. Oblysta 140 jylytý beketi daıyndaldy. Sonymen qatar, 7 myń tonnadan astam ınertti materıaldar satyp alyndy.