Aqtóbeniń aýdandaryna Astana men Almaty ataýlary qalaı berildi - Saparbaev jaýaby
ASTANA. QazAqparat - Búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev oblys ortalyǵynyń jańadan qurylǵan eki aýdanyna Astana men Almaty ataýlarynyń berilý sebebin túsindirdi, dep habarlaıdy QazAqparat.
«Aqtóbedegi eki aýdan ataýyna qatysty aıtar bolsam, birinshiden, Qazaqstanda zań bar. Onda oblys ortalyǵynda turatyn halyq sany 400 myńnan asatyn bolsa, ekonomıkalyq damýy, bolashaǵy bolsa, onda ol oblystyń ortalyǵy aýdandarǵa bólinedi delingen. Osy tártipti eskere otyryp usynys jasadyq. Qazirgi tańda Aqtóbe oblysynda 480 myń adam turady. Qala qaryshtap damyp keledi. Osyny eskere kele eki aýdanǵa bólindi. Máslıhat, Úkimet qoldady», - dedi Berdibek Saparbaev BAQ ókilderiniń saýalyna oraı.
Onyń aıtýynsha, kelesi másele eki aýdanǵa ataý berýge qatysty boldy.
«Ataý berý jóninde de zań, normatıvtik qujattar bar. Onda qandaı tulǵalardyń, qandaı jerlerdiń atyn berýge bolatyndyǵy jazylǵan. Biz munyń barlyǵyn, halyqtyń pikirin eskerdik. Arnaıy jumys toby qurylyp, eki jerde qoǵamdyq tyńdaý ótkizdi. Ol tyńdaýǵa múmkindiginshe kóp adam qatysty. Halyq arasynda saýalnama júrgizildi. Saýalnamada Ábilqaıyr, Abaı, Eset batyr attary, Sazdy, Elek ózenderiniń aty jáne Astana men Almaty ataýlary boldy. Eń kóp usynylǵan ataýlardyń tizimin qoǵamdyq keńeske usyndyq. Al usynylǵan tizimde Sazdy men Elek ózenderiniń ataýy joq. Jalpy usynymyzdy kópshilik qoldady», - dedi oblys ákimi.
Óńir basshysynyń aıtýynsha, Aqtóbe qalasynyń eki aýdanyna Astana men Almaty ataýyn berý usynysyn respýblıkalyq onomastıka komıssııasy, qalalyq, oblystyq máslıhattyń depýtattary qoldaǵan.
«Sonymen sheshim qabyldandy. Qalanyń bir bóligi Astana, ekinshi bóligi Almaty bolady. Meniń oıymsha, bul ataýlar durys. Jalpy, qarsy bolǵandardyń da bar ekenin bilemin. Tipti olar áleýmettik jelide qol jınamaq boldy, jınaǵan da shyǵar. Bastamashy toppen kezdestip, túsindirip aıttym. Elek ózeni Qazaqstannan bastalyp, Reseıden aıaqtalady. Sazdy kishkentaı ǵana ózen. Jalpy, biz kópshiliktiń sózine qulaq asýymyz kerek. Al bes-altaýynyń aıtqanyn tyńdasaq alysqa barmaımyz. Qazir esh másele joq»,- dedi ol.
