Aqtóbeniń ár aýylynda kınoteatrlar ashylýy múmkin
AQTÓBE. QazAqparat - Aqtóbeniń ár aýyly kınoteatrmen qamtylýy múmkin. Májilis depýtattarymen kezdesý kezinde mádenıet salasynyń qyzmetkerleri memlekettik-jekemenshik seriktestik aıasynda kınoteatrlardy qalpyna keltirý jolyn usyndy, dep habarlaıdy QazAqparat tilshisi.
Qazir ınternet damyǵan zaman bolǵanymen, aýyl halqynyń baratyn jeri joq. Barlyq klýbtar jabylǵan, al mektepterdegi májilis zaly tek mereke kúnderi ata-analarǵa shaǵyn kontsert uıymdastyrady.
«Aqtóbege QR Parlamenti Májilisiniń depýtaty Amanjan Jamalov kelip, mádenıet salasynyń qyzmetkerlerimen kezdesti. Sol kezde ol sáýir aıynda Parlamentte «Kıno týraly» Zań qaralatynyn aıtty. Biz óz tarapymyzdan aýyldaǵy kınoteatrlardy qaıta qalpyna keltirýdi usyndyq. 90-jyldardyń aıaǵynda ońtaılandyrylý júrip, kınofıkatsııa basqarmasy tarap, bul salanyń ıesiz qalǵany aıtyldy. Qazir ulttyq, patrıottyq rýh beretin fılmder túsirilip jatyr. Biraq ol kópshilikke, aýyl halqyna jete bermeıdi. Osy olqylyqtyń ornyn toltyrý úshin jergilikti jerde kıno kórsetýdiń zańdy tetikterin qarastyrýdy suradyq»,- dedi oblystyq mádenıet, muraǵattar jáne qujattama basqarmasy basshysynyń mindetin atqarýshy Qydyrǵalı Ermuhan.
Aqtóbelik mádenıet qyzmetkerleri bul jumysty memlekettik-jekemenshik seriktestik negizindi iske asyrýdy kózdep otyr. Shaǵyn kınoteatrlar - eń tıimdi joly.
«Aýdan ákimderine habar berip, usynys týraly aqparat taratyldy. Kásipkerlerdiń de qyzyǵýshylyǵy bar. Máselen, taıaýda ǵana bir kásipker Mártók, Qobda aýdandaryn aralap, kıno kórsetý usynysyn aıtty. Qoldaý hat jazyp, aýylǵa barsa, mádenıet oshaqtaryn beremiz. Sonymen qatar, bul salany qolǵa alǵan kásipkerlerdiń arnaıy apparatýra alýy úshin «Damý» qory arqyly aqsha bólinse degen usynys bar»,- dedi Qydyrǵalı Ermuhan.
