Aqtóbeniń ár aýdanynda Ákeler alleıasy ashylady
Búgin Aqtóbe qalasyna balalaryna úlgi bolyp júrgen ákeler jınaldy. III respýblıkalyq forýmǵa oblys ákimi Berdibek Saparbaev, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen qatysty. Maqsat - qoǵamnyń nazaryn ákeniń róli men ákeniń óskeleń urpaqty tárbıeleýde qosatyn úlesi máselelerine aýdarý.
«Memleket basshysy qazaqstandyq otbasylardyń ál-aýqatyn jaqsartýǵa jáne qoldaýǵa úlken kóńil bóledi. Osy maqsatta kóptegen memlekettik baǵdarlamalar men zańdar qabyldandy, otbasylyq-demografııalyq saıasat jónindegi Ulttyq komıssııa quryldy. Balalardy tárbıeleýdegi ákelerdiń rólin baǵalaý óte qıyn. Oblystyń barlyq aýdandarynda úlgili ákelerdiń mártebesin asyrý maqsatynda Ákeler alleıasyn salýdy josparlap otyrmyz», - dedi oblys ákimi Berdibek Saparbaev.
Respýblıkalyq forýmǵa elimizdiń ár óńirinen delegat, Ulttyq komıssııanyń basshylyǵy men músheleri, QR Parlamenti depýtattary, ortalyq memlekettik jáne jergilikti atqarýshy organdardyń basshylary, qoǵam qaıratkerleri, úkimettik emes uıymdardyń ókilderi, úlgili ákeler qatysty.
«Búginde ákeniń otbasy tárbıesindegi rólin arttyrý, balalardyń patrıotızm sezimin qalyptastyrýdaǵy áke rólin kúsheıtý, «Rýhanı jańǵyrý» baǵdarlamasy sheńberinde bilimge umtyldyrý - bizdiń jumysymyzdyń basty baǵyty», - dep atap ótti QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen.
Qatysýshylar ákeler ınstıtýtynyń rólin, jumys pen bala tárbıesin úılestirý, Qazaqstandaǵy ákelerdiń qoǵamdyq qozǵalysy damýynyń búgini men keleshegin talqylady. Aqtóbe oblysy ákiminiń baspasóz qyzmetiniń habarlaýynsha, «Ákeler keńesi» qoǵamdyq birlestigi ár aımaqty óz bólimshesin ashyp, birige jumys isteýdi kózdep otyr.
