Aqtóbeniń aqyn-jazýshylary qazaq drama teatry men ortalyq kitaphana salýdy usyndy
AQTÓBE. QazAqparat – Aqtóbe oblysynyń ákimi Ońdasyn Orazalın aqyn-jazýshylarmen kezdesti. Kezdesýde birneshe usynys aıtyldy, dep habarlaıdy QazAqparat tilshisi.
Jazýshylar odaǵyna Aqtóbeniń 14 aqyn-jazýshysy múshe. Olar búgin oblys ákimimen kezdesip, oıda júrgen birneshe usynystaryn aıtty. Alǵashqysy – qoǵamdyq qor qurý. Bul qoǵamda ónerdi dáripteıtin, ádebıetti súıetin mádenı ortany tárbıeleý maqsatynda tyń jobalar men sharalardy ótkizýge baǵyttalady. Sonymen qatar oblystyq ortalyq kitaphana, T.Ahtanov atyndaǵy qazaq drama teatryn, Álııa Moldaǵulovaǵa arnalǵan mýzeı salýdy usyndy. Bıyl jobalyq-smetalyq qujat daıyndalyp, aldaǵy jyldary qurylys bastalýy tıis. Biraq ázirge jer telimi bólinbedi, jobasy da daıyn emes.
«Aqtóbe óńiri aqyn-jazýshylarǵa, tanymal tulǵalarǵa kende bolmaǵan. Aldyńǵy kezdesýlerde aıtylǵan usynystaryńyzdy eskere otyryp, keshendi joba jasadyq. Sonyń aıasynda qoǵamda ónerdi dáripteıtin, ádebıetti súıetin mádenı ortany tárbıeleý maqsatynda tyń jobalar men sharalardy ótkizýge qoldaý kórsetetin qoǵamdyq qor qurýdy qolǵa aldyq. Osy qordyń kómegimen óńirdegi aqyn-jazýshylardyń kitaptaryn jaryqqa shyǵaramyz. Sonymen qatar, qazirgi zaman talabyna saı oblystyq kitaphana men T.Ahtanov atyndaǵy drama teatrynyń, Keńes Odaǵynyń batyry Á.Moldaǵulovanyń 95 jyldyǵyna oraı Álııa mýzeıiniń qurylysyn júrgizýdi josparlap otyrmyz. Óner men ádebıetti qoldaýdy odan ári júrgize beretin bolamyz, - dedi oblys ákimi Ońdasyn Orazalın.
Aıta keteıik, aldaǵy ýaqytta «Aqtóbe kitaphanasy» serııasymen aqyn-jazýshylardyń 27 jınaq kitaby jaryqqa shyǵady.
Aqyn Іztaı Mámbetovtiń 90 jyldyǵy men aqyn Saǵı Jıenbaev, jazýshy Tobyq Jarmaǵambetovtiń 85 jyldyq mereıtoılaryna arnalǵan keshendi jospar jasalyp, keń kólemde toılanady.
2020 jyldan bastap jas talanttardy qoldaý maqsatynda T.Ahtanov, Q.Shańǵytbaev, T. Aıbergenov atyndaǵy arnaıy syıaqy taǵaıyndalyp, Jazýshylar odaǵy Aqtóbe fılıalynyń múshelerine jylyna bir rettik stıpendııa taǵaıyndalatyn boldy. Jergilikti úzdik 10 jas aqyn-jazýshynyń alǵashqy týyndysy baspadan shyǵady. Qalada «Ádebıet álemi» rýhanı ortalyǵyn jáne jergilikti aqyn-jazýshylar alleıasyn salý josparlanyp otyr.
Kezdesý kezinde aqyn Gúljaınar Qaldına «Garrı Potterdiń» qazaq tilindegi nusqasyn shyǵarýǵa qoldaý kórsetýdi surady.
«Birneshe jyl buryn 4-5 synyp oqýshysy kitaphanaǵa kelip, «Garrı Potterdiń» qazaq tilindegi nusqasyn surady. Sol balamen sóılesip, kitapty aýdarýǵa kelistim. Jyldar ótti, qazir bir tomy aýdaryldy. Endi ony baspadan shyǵarý úshin avtorlyq quqyq kerek eken. Avtordan ruqsat alý úshin memleket nemese jergilikti ákimdik kelisim jasaýy tıis. Talap osy. Men osy kitapty shyǵarǵym keledi, ákimdikten kómek qajet», - dedi aqyn Gúljaınar Qaldına.
Onyń aıtýynsha, balalar men jasóspirimder detektıvterdi, motıvatsııalyq kitaptardy oqıdy. Al suranysty qanaǵatandyratyn shyǵarma qazaq tilinde joqtyń qasy.
