Aqtóbeniń ákimi men mektep dırektorlary ana týraly án aıtty
AQTÓBE. QazAqparat - Aqtóbede Halyqaralyq áıelder kúnine arnalǵan birneshe is-shara ótti. Oblys ákimi medıtsına, pedagogıka salasynyń qyzmetkerlerin quttyqtap, qala ákimi Іlııas Ispanov ana týraly án shyrqady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev búgin pedagogıka jáne medıtsına salasynyń qyzmetkerlerin Halyqaralyq áıelder kúnimen quttyqtady. Merekelik shara kezinde mektep, kolledj dırektorlary ana týraly án shyrqady.
«Merekege oraı tyń usynys túsip, bilim salasyndaǵy er adamdardyń bári arnaıy horǵa daıyndaldy. «Anaǵa sálem» ánin oryndap, áriptesterimizge syı jasadyq. Horda án aıtý úshin 2-3 kún daıyndyq júrdi. Óz dırıjerimiz de bar. Názik jandy áriptesterimizge syı jasap, ózimiz de tamasha áserge bólendik. Bizdiń ánimizge oblys ákimi Berdibek Saparbaev ta qosyldy», - dedi mektep dırektory ıÝrıı Qurmanov.
Óńir basshysy pedagogtardy quttyqtap, kópbalaly ustazdarǵa alǵys hat, 100 myń teńgeniń sertıfıkatyn tabys etti.
«Elbasy bilim salasyna úlken kóńil bóledi. Muǵalimderdiń jalaqysyn kóterip, bilim salasynyń materıaldyq-tehnıkalyq bazasyn nyǵaıtý oń jolǵa qoıylǵan. Ári bes áleýmettik bastama jasap, Úkimetke, atqarýshy bılikke tapsyrma berdi. Qazaqstannyń damýy bilimdi urpaqta. Sizder osy salada talmaı eńbek etip kelesizder», - dedi oblys ákimi Berdibek Saparbaev.
Keıin óńir basshysy medıtsına salasynyń qyzmetkerlerin quttyqtady. Búgin Aqtóbe medıtsınalyq ortalyǵynyń reanımatolog, kardıo-reanımatologi páterli boldy. Eki dáriger de adam ómirin saqtap qalýda aıanbaı eńbek etip júr.
«Aqtóbege Ekibastuz qalasynan keldim. Qyzym Aqtóbedegi medıtsınalyq ýnıversıtetke oqýǵa túsip, men de aýrýhanadan shaqyrtý aldym. Biz bir aýrýhanada úsh mamanbyz. Kezekpen jumys isteımiz. Bul páter men úshin úlken kómek boldy. Jalaqymyz da jaqsy»,- dedi dedi Merýert Qabbasova. Sonymen qatar, Aına Naýqanqyzy da páterli boldy. Halyqaralyq áıelder kúni uzaq jyl boıy bir mekemede jumys istegen feldsher, otbasylyq dárigerler men laboratorııa mamandary alǵys hat, otandyq saýyqtyrý oryndaryna joldama aldy.
Aıta keteıik, búgin qala ákimi Іlııas Ispanov ta aqtóbelik qyz-kelinshekterdi merekemen quttyqtap, Ana týraly án shyrqady.
Sonymen qatar, 12 kópbalaly anaǵa Altyn alqa, Kúmis alqa tapsyrdy.
