Aqtóbeniń ákimi indetpen kúres jumysyn túsindirip berdi
AQTÓBE. QazAqparat – Aqtóbe oblysynyń ákimi Ońdasyn Orazalın tikeleı efır kezinde koronavırýs, pnevmonııamen kúres jumystaryn aıtyp berdi, dep habarlaıdy QazAqparat tilshisi.
Aqtóbe oblysy boıynsha 2 myńǵa jýyq adam indetke shaldyqqan. Sońǵy táýlikte 49 adam koronavırýs juqtyrdy. Sonymen birge pnevmonııaǵa shaldyqqandar oblys ortalyǵyndaǵy 6 aýrýhanada em qabyldap jatyr.
«Ekinshi tolqyn tek kúzde keledi» degen boljamǵa súıenip, soǵan saı jospar qurylǵan bolatyn. Deıturǵanmen ómir óz degenin istedi. Eýropada, Italııa, Ispanııa elderinde bolǵan jaǵdaı bizge kelip jetti. Eń kóp alańdatqany – pnevmonııanyń órtip ketýi. Kúrdeli jaǵdaıda da atqarýshy bılik shuǵyl áreket jasady. Qazirgi kezde koronavırýstan góri pnevmonııa alańdatyp otyr. Birinshiden, naýqastardyń jatatyn oryn sanyn 50 paıyzǵa, ıaǵnı, bastapqydan úsh esege deıin kóbeıttik. Qazir oblysta 3 300 oryn bar. Sońǵy aptanyń ózinde 924 oryndyq 3 prozızorlyq emdeý orny ashyldy. Olar: Aqqaǵaz Dosjanova atyndaǵy jataqhana, «Darý» medtsınalyq ortalyǵy, «Shaǵala» shıpajaıy. Onyń 70 paıyzy qoldanyldy. Taǵy 715 kereýet bar. Sondaı-aq emhanalarda 725 oryndyq kúndizdi statsıonar ashyldy. Kúnine 150-200 adam em qabyldaıdy. Nátıjesinde maýsym aıynda 1 myńǵa jýyq adam emdelip shyqty. Óńirde 150-ge jýyq ókpeni jasandy jeldetý apparaty bar. 19 rentgen, 15 KT apparaty bar. Ottekpen tolyq qamtamasyz etilgen. Dári-dármek emdeý oryndarynda jetkilikti. Reseımen kelisim bar. Búgin taǵy 10 túrli dári jetkiziledi. Biz 14-20 kúnge qajetti dári-dármek qoryn jasap aldyq», - dedi oblys ákimi Ońdasyn Orazalın.
Іndetpen kúres jumystaryna ınfektsıonıster ǵana emes, barlyq dáriger jumyldyryldy. Barlyǵy 2800-ge jýyq medtsına qyzmetkeri jumys istep júr. Sonymen birge 100-den astam oqytýshy-professor qyzmetke kiristi. Medıtsınalyq oqý oryndaryn bitirgen túlekterdi de túgel osy qatarǵa qosylǵan.
«Aýrýhanalarda oryn jetpeıdi, dálizde jatyp qalǵan» degen derek joq. Tikeleı aralap, naýqastarmen kezdestim. Úıden em alyp jatqandar úshin arnaıy call ortalyq ashyldy. Onda oqytýshy-professorlar jumys isteıdi. Tikeleı em jolyn aıtady. Beınekeńes berilip jatyr», - dedi Ońdasyn Orazalın.
Aıta keteıik, maýsym aıynda 120-130 adam pnevmonııamen aýrýhanaǵa tússe, qazir 70-80 adamǵa azaıdy.
