Aqtóbeniń ákimdigi dalada qalǵan 200-den astam adamnyń tek ekeýine kómektespek
AQTÓBE. QazAqparat - Aqtóbe oblysy, Hromtaý aýdanyndaǵy jataqhananyń 243 turǵyny bir aı ishinde turaqty mekenin bosatýy kerek. Bul jaǵdaıdy jergilikti ákimdik biledi. Biraq jekeniń qolyndaǵy jataqhana máselesine Hromtaý aýdandyq ákimdigi aralaspaýdy jón kórgen joq, dep habarlaıdy QazAqparat tilshisi.
Dóń ken baıytý kombınatyna tıesili jataqhanaǵa qonystanǵan Aqtóbe oblysy, Hromtaý aýdanynyń turǵyndaryna jergilikti ákimdik kómektese almaıdy.
«Jataqhana Dóń ken baıytý kombınatyna tıesili. Ǵımarat eski. Dóń ken baıytý kombınaty birneshe márte saraptama ótkizip, nátıjesinde apatty dep tanyldy. Sol qorytyndyǵa baılanysty Hromıt, Sport qonaq úıine ornalastyrýǵa kelisimge keldi. Jumysshylardyń kóbi kombınatta jumys isteıdi. Málim bolǵany, 3 balasy bar otbasy bizdiń ákimdik arqyly jataqhanaǵa ornalastyrylǵan eken. Sol otbasyny ákimdik ıeligindegi páterge ornalastyramyz»,- dedi Hromtaý aýdany ákiminiń orynbasary Seıtmaǵambet Shilmanov.
Buǵan deıin habarlaǵanymyzdaı, zeınetkerler men jetimder, jalǵyzbasty analar men kenshiler qonystanǵan jataqhana apatty dep tanylyp, zaýyt basshylyǵy turǵyndarǵa 1 aı ýaqyt berdi. Tabysy az otbasy músheleri páterden shyǵýdan bas tartyp otyr.
Olar dalada túnep, kúrkede kúneltýge bekinip otyr. Keıbiri «balalarymdy baǵa almaı, jetimder úıine ótkizemin» degen oıǵa kelgen. Ashýǵa býlyqqan turǵyndar óz-ózin órten jiberý týraly aıtty.
«Barlyǵy 243 adam jataqhanada turady. 51 bólmede otbasyly 163 adam turyp jatyr. Sonymen qatar jalǵyzbasty 49 adam bar. Eki zeınetker de qonystanǵan. Bárine aýdan ákimdigi jaýapty. Turǵyn úı komıssııasynyń tóraǵalyǵy aýdan ákimshiliginde. Hromtaý aýdandyq qarjy bólimi de jaýapty. Jataqhana qalada ornalasqanymen, bári aýdan ákimdiginen kómek surap barady. Suraqtyń qalaı sheshiletinin bilmeımin. Jataqhana Dóń ken baıytý kombınatyna tıesili. Bári óz jumysshylaryna arnalǵan oryn. Sońǵy jyldary adamdar qonystana bastady. Saraptama tujyrymyna baılanysty, jataqhanany paıdalanýǵa bolmaıdy. Apatty dep aıtylǵan soń ótken jyly jóndeý jasaý týraly sóz qozǵaldy. Biraq turý qaýipti eken. Kombınat 320 mıllıon teńge bólip, jańa jataqhana salmaqshy»,- dedi Hromtaý qalasynyń ákimi Asqar Nurtazın.
