Aqtóbeniń 6 mektebinde órt qaýipsizdigi erejesi buzylǵan
AQTÓBE. QazAqparat - Aqtóbe qalasynda mektep, kolledj dırektorlary men saýda, oıyn-saýyq keshenderi basshylarynyń qatysýymen órt qaýipsizdigi sharasyn kúsheıtý sharasy ótti, dep habarlaıdy QazAqparat tilshisi.
Reseıdiń Kemerova qalasynda bolǵan órt oqıǵasynan keıin mektep, kolledj basshylaryna, saýda, oıyn-saýyq keshenderiniń ıelerine muqııat bolý eskertildi. Órtke qarsy kúres basqarmasy tekserý jumystaryn jalǵastyryp jatyr. Bıyl 49 mektepti tekserý josparlanǵan. Mamandar 6 mektepte órt qaýipsizdigi erejesi buzylǵanyn anyqtady.
«Aqtóbe qalasyndaǵy №26, 42, 58, 21, 60 jáne Elek orta mektepteri órt qaýipsizdigi erejesi saqtalmaǵan. Toqtyń qysqa tuıyqtalýy, shyǵý esikti jaýyp tastap, temir torlar qoıylǵan. Bul tirkelgen kemshilikter»,- dedi Aqtóbe qalalyq tótenshe jaǵdaılar qyzmeti basqarmasynyń basshysy Aıbat Jańabergenov.
Jıyn kezinde Aqtóbedegi eń úlken saýda ortalyǵy «Kerýen sıtı» saýda keshenindegi qaýipsizdikti kúsheıtý tapsyryldy. Ári qaladaǵy eń úlken bazarlar men bilim ordalary baqylaýǵa alynady.
«Reseıde bolǵan oqıǵa kezinde saýda orny jeke me, onyń ıesi kim dep surap jatqandar az. Bıznesti qorǵaý úshin tekserý bolmady ma? Qaıǵyly jaǵdaıdan keıin bul suraq ta mańyzdy emes. Bári balanyń, adam óliminiń kóp ekenin aıtty. Sondyqtan órt qaýipsizdigi sharasyn kúsheıtip, tekserýdi jalǵastyrý kerek»,- dedi Aqtóbe qalasynyń ákimi Іlııas Ispanov.
Jergilikti bılik jeke balabaqsha, mektepti tekserýge quqyqtary joq ekenin eske salyp, baqylaýdyń basqa ádisterin qarastyrý tapsyryldy. Ári mektep, balabaqsha balalary órt kezinde qalaı qımyldaý kerek ekenin bilýi tıis. Jıyn kezinde mektep, kolledj dırektorlary men saýda, oıyn-saýyq keshenderiniń basshylaryna órt kezindegi oqıǵalar kórsetildi.
