«Aqtóbemunaıgaz» AQ tender ótkizgende adal báseke qaǵıdalaryn buzǵan

NUR-SULTAN. QazAqparat - «SNPS-Aqtóbemunaıgaz» AQ áreketterinde josyqsyz básekelestik belgileri baıqalady, dep habarlaıdy QazAqparat Básekelestikti qorǵaý jáne damytý agenttigine silteme jasap.

Aqtóbe oblysy boıynsha monopolııaǵa qarsy departamentke ótinish kelip tústi.

Onda «SNPS-Aqtóbemunaıgaz» AQ qubyr satyp alý kezinde óziniń konkýrstyq qujattamasynda qubyr ónimderin naqty jetkizýshiden satyp alýdy kózdeıtin tehnıkalyq shekteýlerdi kórsetedi, sol arqyly adal básekelestik qaǵıdattaryn buzady jáne jetkizýshilerdiń keń tobynyń konkýrsqa qatysýǵa qoljetimdiligin shekteıdi delingen.

Monopolııaǵa qarsy departament ótinishti zerdeleý jáne onymen jumys isteý barysynda baıandalǵan málimetterdiń durystyǵyn anyqtady.

«SNPS-Aqtóbemunaıgaz» AQ qubyrlaryn satyp alý ereksheliginde kórsetilgen qubyr ónimderiniń tehnıkalyq sıpattamalary tenderge CNPC tobyna kiretin bir ǵana kompanııanyń qatysýyna múmkindik berdi.

Osylaısha, adal básekelestik qaǵıdattary buzylyp, ónim berýshilerdiń keń aýqymynyń konkýrsqa qatysýǵa qoljetimdiligi shekteldi.

Josyqsyz básekeniń anyqtalǵan belgileri negizinde Aqtóbe oblysy boıynsha monopolııaǵa qarsy departament olardy joıý boıynsha shara qabyldaý úshin «SNPS-Aqtóbemunaıgaz» AQ atyna habarlama shyǵardy.

«SNPS-Aqtóbemunaıgaz» AQ monopolııaǵa qarsy organǵa habarlamany oryndaý merzimin uzartý týraly ótinish jasady, alaıda habarlamany oryndaý úshin qosymsha ýaqyt talap etilmegendikten, ótinishhattan bas tartyldy.

Nátıjesinde monopolııaǵa qarsy organnyń habarlamasy tolyq kólemde oryndaldy, onyń ishinde qubyr satyp alýǵa tenderdiń kúshi joıyldy.