Aqtóbelikter úıin tastap shyqqan adamdarǵa kıim-keshek pen azyq-túlik tasyp jatyr
AQTÓBE. KAZINFORM — Aqtóbedegi jylý jınaý beketine turǵyndar qolda bar zaty men jańa taýarlar tasyp jatyr. Qalada eki beket bolsa, onyń biri «Anaǵa taǵzym» ortalyǵynda ornalasqan.
«Anaǵa taǵzym» ortalyǵy úzilissiz jumys istep jatyr.
Munda muǵalimder men stýdentter, eriktiler qolǵabys etip júr. Olardyń mindeti — ákelingen taýardy tirkep, iriktep, suryptaý.
— Jylý jınaý beısenbi kúni bastaldy. Áleýmettik jeliden habar estigen eriktiler aldymen jetti. Sonymen birge balabaqsha, mektep ujymdary, ata-analar jınap, zattardy ákelip jatyr. JShS, jeke kásipkerlik ıeleri de keldi. Alǵashynda bizge tósek-oryn kerek bolǵan. Suranysqa saı bári jetkizildi. Naqty qajet zattardyń tizimi de shyqty. Sharýashylyq buıymdary men gıgıenalyq zattar jetkizildi. Tek tez buzylatyn zattar kerek emes. Juma kúni aıaq kıim, ish kıim suratty. Ony da aıtyp, kómek kórsetýge nıetti adamdarǵa qulaqqaǵys etip jatyrmyz. Ákelip jatqan da, tasyp jatqan da eriktiler. Muǵalimder de bar, — dedi Aqtóbe qalasy ákimi apparatynyń áleýmettik sala bólimi basshysynyń mindetin atqarýshy Nursáýle Jylqybaeva.
Onyń aıtýynsha, jańa kıim ǵana suranysta bar. Adamdar eski dúnıeniń de táýiri bolǵanyn qalaıdy.
— Keshe 7-8 saǵat jumys istedim. Búgin taǵy kelip turmyn. Bizdiń mindetimiz - ákelingen zattardy suryptap, suranysqa saı taýyp berý. Ózim birinshi kýrs stýdentimin, qoǵamdyq jumystarǵa aralasý durys dep oılaımyn, — dedi stýdent Janat Kúmisbek.
Aıta keteıik, eriktiler arasynda qarapaıym turǵyndar da bar. Olar adamdardan tizim alyp, qabyldaý ornynan kelip, alyp ketedi.
— Men № 71, 5 mektepterden suranystardy jazyp alyp, keıin qabyldaý ornynan alyp ketemiz. Qazir áıelder dezodorant, ish kıim suratty. Balalarǵa jaǵatyn krem, seppe kerek. Oıynshyq ta, jaıalyq ta surady. Adamdardyń kóńil-kúıi jaqsy, tamaq, kıimder úshin alǵys aıtty. Bir-eki úıge tamaq ta tasyp, fotoesep berip júrmin. Ózimniń úıimniń janyna sý kelip qaldy, biraq amanbyz. Balalarymnyń synyptastarynyń ata-anasyna kómek kerek bolǵan soń shydaı almaı, kirisip kettim, — dedi erikti, qala turǵyny Elnur Bojybaeva.
Aıta keteıik, aldyn ala málimet boıynsha qalada 200-den astam úıge sý kirgen.
