Aqtóbelikter úshin biryńǵaı ýaqyt beldeýiniń tıimdi tusy qandaı
AQTÓBE. KAZINFORM – QR SIM Tehnıkalyq retteý jáne metrologııa komıtetiniń tóraǵasy Qýanysh Elikbaev Aqtóbede biryńǵaı ýaqyt beldeýiniń tıimdi tusyn aıtyp berdi.
1-naýryzdan bastap elimizde biryńaı ýaqyt beldeýi bolady. Qazaqstannyń barlyq aımaǵy UTC+5 beldeýine kóshedi. QR SIM Tehnıkalyq retteý jáne metrologııa komıtetiniń tóraǵasy Qýanysh Elikbaev, ǵalym, bıotehnolog Ámir Qýat aqtóbelik depýtattarmen kezdesip, mán-mańyzyn túsindirdi.
– Úkimet mańyzdy sheshim qabyldady. Bul elimiz úshin tarıhı kez dep te aıtýǵa bolady. Qazirgi kezde biz túsindirý jumysyn júrgizýdi jón kórdik. Negizin jobalaǵan Saýda jáne ıntegratsııa mınıstrligi ekenin bilesizder. Tehnıkalyq retteý jáne metrologııa komıteti. Metrologııa ınstıtýty ýaqyt etalonyn da zerttep, zerdeleıdi. Biz elimizdiń bes óńirinen baramyz. Aldymen Aqtóbege kelip otyrmyz. Almaty, Jambyl, Qostanaı jáne Shyǵys Qazaqstan oblystaryn aralap, túsindiremiz. Al Aqtóbeden bastaý sebebi – bul elimizdiń batysynda ornalasqan óńir. Ekinshiden, Astana batystyń ýaqyt beldeýine aýysady. Kommýnıkatsııa, bıznes, memleketti basqarý júıesinde oń ózgerister bolady. Aqtóbelikter Astanamen, elimizdiń ózge aımaǵymen baılanysqanda ýaqyt aıyrmashylyǵy qıyndyq týǵyzatyn edi. Máselen, Astanada 9:00-de jınalys bastalsa, keıde aqtóbelikter úshin erte qamdanýǵa týraly keledi,- dedi QR SIM Tehnıkalyq retteý jáne metrologııa komıtetiniń tóraǵasy Qýanysh Elikbaev.
Jıynda ýaqyt beldeýiniń adam densaýlyǵyna áseri de aıtyldy.
– UTC+6-da turyp jatqan soń adamnyń tún uıqysy bir saǵatqa kemip otyr. Adam aǵzasyndaǵy regeneratsııa durys jumys istemeı, elimizde onkologııalyq aýrý, ınfarkt, ınsýlt kóbeıip ketti. Tipti elde sýıtsıd ósip ketti,- dedi ǵalym, bıotehnolog Ámir Qýat. Al M.Ospanov atyndaǵy Batys Qazaqstan medıtsına ýnıversıtetiniń rektory Áset Qalıevtiń aıtýynsha, jańa ýaqyt beldeýine balalardy birden emes, birtinden daıyndaý kerek.
– Balany uıqyǵa aldymen 15 mınýt buryn jatqyzǵan jón. Keıin 30 mınýt, 45 mınýt jáne saǵatqa aýystyrý qajet. Qazirden birtindep kóshýge daıyndaý kerek. Osylaısha kezeń-kezeńimen beıimdelýge bolady,- dedi Áset Qalıev.
