Aqtóbelikter tatýlyqtyń nyshanyna aınalǵan Alǵys aıtý kúnin atap ótti
AQTÓBE. KAZINFORM – Aqtóbede Alǵys aıtý kúni men Qazaqstan halqy Assambleıasynyń 30 jyldyǵyna arnalǵan merekelik is-shara uıymdastyryldy.
QHA ǵımaratynda ótken «Alǵys bárińe» atty mádenı is-sharaǵa oblys ákimi, túrli etnomádenı birlestikterdiń ókilderi men óńir turǵyndary qatysty.
30 jyl buryn 1 naýryzda elimizde Qazaqstan halqy Assambleıasy quryldy. Osy jyldar ishinde QHA eldegi etnosaralyq kelisimdi saqtaýda mańyzdy ról atqardy jáne qoǵam men memleket arasyndaǵy dıalog úshin biregeı alańǵa aınaldy.
Іs-sharada óńir basshysy Ashat Shaharov Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqyp berdi. Onda Assambleıanyń ulttyq birlikti nyǵaıtýǵa, eldegi beıbitshilik pen turaqtylyqty saqtaýǵa qosqan zor úlesi jaıly atap ótildi.
Oblys ákimi aqtóbelikterdi ataýly kúnmen jáne Alǵys aıtý kúnimen quttyqtap, onyń meıirimdiliktiń, beıbitshilik pen kelisimniń sımvoly ekenin tilge tıek etti. Ol óńirdiń barsha turǵyndaryna oblystyń damýyna qosqan úlesteri úshin alǵysyn bildirip, densaýlyq, amandyq jáne tabys tiledi.
– Búgingi Qazaqstan halqy Assambleıasynyń 30 jyldyǵymen tuspa-tus kelgen kóktemniń shýaqty merekesi Alǵys aıtý kúnimen shyn júrekten quttyqtaımyn. Bul mereke – ózara tilektestikti, janashyrlyqty, qamqorlyqty dáripteıtin, rızashylyq pen meıirimniń, beıbitshilik pen kelisimniń úılesimi tapqan kúni. Alǵys aıtý kúni degen – qıyn sátterde bizdi qoldaǵandarǵa jyly sózder aıtýǵa ǵana emes, sonymen birge beıbitshilik pen kelisimge degen adaldyǵymyzdy qaıta dáleldeýge múmkindik beretin erekshe sát. Barshańyzdy yntymaǵy men birligi jarasqan óńirimizdiń nyǵaıýyna jáne ósip-órkendeýine, kórkeııýine, turaqty damýyna qosqan úlesterińiz, sińirgen qajyrly eńbekterińiz úshin alǵysymdy bildiremin. Ár otbasyǵa amandyq, baq-bereke jáne tatýlyq tileımin, - dedi Ashat Shaharov.
Osydan keıin oblys ákimi Assambleıanyń qalyptasýy men damýyna eleýli úles qosqan óńirdegi QHA ardagerlerine alǵys hattar tabys etti. Marapattalǵandardyń qatarynda Habıba Sarkýlova, Konstantın Tshaı, Hasan Sagaev, Roza Boldagarına jáne Erkin Qurmanbekov bar.
Sondaı-aq «Jumysshy mamandyqtar jyly» aıasynda oblys ákiminiń alǵys hattarymen ártúrli sala ókilderi marapattaldy. Olar kúndelikti ómirde qajyrly eńbekterimen aımaqtyń órkendeýine úles qosyp keledi.
Alǵyshat «Neo plus» JShS qyzmetkeri Aıkenje Namazbaevaǵa tabystaldy. Aıkenje kásiporynda 21 jyldan beri jumys isteıdi, óz mindetterin adal atqaryp júr. Onyń kúsh-jigeriniń arqasynda qalada tazalyq pen tártip qamtamasyz etilýde.
Sonymen qatar «Qala Trans» JShS avtobýs júrgizýshisi Sergeı Hramov ómiriniń 37 jylyn qoǵamdyq kólik salasyna arnady, jolaýshylardyń jaılylyǵy men qaýipsizdigin qamtamasyz etetin kúndelikti jumysy úshin ol alǵys hatqa ıe boldy.
Oblys ákiminiń Alǵys hatymen Aqtóbe hrom qosyndylary zaýytynyń jóndeý-mehanıkalyq tsehynyń kran mashınısi Gúlýsıa Rabeja marapattaldy. Eńbek ótili – 46 jyl, ol ózin árkez bastamashyl jáne jaýapty maman retinde kórsetip keledi.
Marapattaý rásiminen keıin is-shara etnomádenı birlestikterdiń ónerpazdary ázirlegen merekelik kontsertpen jalǵasty. Baǵdarlamada «Shatlyq», «Dostyq» ansamblderi, «Zhana.kz» jáne basqa da horeografııalyq jáne vokaldyq nómirler kórermen nazaryna usynyldy.
Mereke Qazaqstan halqynyń dostyǵy men birliginiń mańyzyn taǵy bir aıshyqtaı tústi.