Aqtóbelikter Qazaqstan halqynyń birligi kúnin jyly ári dostyq atmosferada atap ótti
AQTÓBE. KAZINFORM — «Qazaqstan halqyna myń alǵys» stelasy aýmaǵynda ótken jarqyn ári kórkem shara eshbir kórermendi beı-jaı qaldyrmady.
Bıylǵy Qazaqstan halqynyń birligi kúni erekshe mańyzǵa ıe. Sebebi 2025 jyl — Qazaqstan halqy Assambleıasynyń 30 jyldyq mereıtoıy. Bul aıtýly oqıǵa óńirimizde turatyn túrli etnos ókilderin bir shańyraqtyń astyna biriktirdi. Kún boıy alańda jylylyq, qýanysh pen shattyqtyń erekshe atmosferasy ornady.
Sahnada «Suńqar», «Ladýshkı», «ıAzǵy mońnar», «Borvınok», «Oksana», «Desh», «Rýsskaıa pesnıa» jáne basqa da ansamblder óner kórsetti. Olar qazaq, orys, tatar, ýkraın, syǵan tilderinde ánder oryndady. Kórermender ár oryndaýshyny ystyq yqylaspen qarsy alyp, birge qosylyp án shyrqady.
Alańda etnomádenı birlestikter daıyndaǵan kórme uıymdastyryldy. Onda árbir etnostyń ulttyq buıymdary, sándik-qoldanbaly óner týyndylary qoıylyp, ár halyqtyń baılyǵy men ózindik bolmysy kórsetildi.
— Mundaı kúni ortaq shańyraǵymyzdan árdaıym ashyq ári beıbit aspan kóringenin qalaısyń. Barshańyzdy birlik merekesimen quttyqtaımyn, elimizge tatýlyq, kelisim men órkendeý tileımin», — deıdi «Vıara» bolgar ortalyǵynyń ókili Olga Marınova.
«Qazaqstan halqynyń birligi kúninde barsha qazaqstandyqtarǵa beıbitshilik, jaqsylyq pen kelisim tileımin. Ár úıde jylý, al júrekterde bir-birine degen qurmet bolsyn», — deıdi «Ýrartý» armıan etnomádenı birlestigi — aqsaqaldar keńesiniń tóraǵasy Arýtıýn Mıkaelıan.
Aıta ketý kerek, Aqtóbe oblysyndaǵy Qazaqstan halqy Assambleıasynda 17 etnomádenı birlestik bar. Onyń quramynda aqsaqaldar men analar keńesteri, «Jomart jan» ortalyǵy, jýrnalıster klýby, ǵylymı-saraptamalyq top jáne basqa da baǵyttar jumys isteıdi. Barlyǵy elimizdegi beıbitshilik pen turaqtylyqtyń myzǵymas negizi — ultaralyq kelisimdi nyǵaıtýǵa zor úles qosyp keledi.
Qazaqstan halqynyń birligi kúnine arnalǵan merekelik baǵdarlama kóterińki kóńil-kúımen aıaqtaldy — «Atameken» ániniń birlese oryndalýy jáne ortaq shańyraq astyndaǵy halyqtardyń dostyǵy men birliginiń jarqyn sımvolyna aınalǵan dostyq horymen túıindeldi.