Aqtóbelikter Qala kúnin jarqyn kóńil kúımen ári erekshe yqylaspen toılady

28 mamyr kúni Aqtóbe óziniń 157 jyldyǵyn atap ótti. «Qazaq halqyna myń alǵys» stelasy mańynda ótken merekelik kontsertke oblys ortalyǵynyń myńdaǵan turǵyny men qonaǵy jınaldy. Kesh bastala salysymen qalada jańbyr jaýǵanymen, bul aqtóbelikterdiń merekelik kóńilin túsire almady. Qolshatyrlaryn asha salyp, jurt alańnan tarqamaı, kontserttik baǵdarlamany tamashalaýdy jalǵastyrdy.

Aqtóbe qalasy ákimdiginiń baspasóz qyzmeti málimetinshe, sahna tórinen mahabbat, týǵan ólke men Aqtóbe týraly ásem ánder shyrqaldy. Kórermender ánshilerge qosylyp án aıtyp, telefonǵa túsirip, árbir oryndaýshyny ystyq yqylaspen, zor qoshemetpen qarsy aldy.

Іs-sharaǵa oblys ákimi Ashat Shaharov ta qatysty. Ol qala turǵyndarymen birge basty alańda bolyp, týǵan Aqtóbeniń merekelik atmosferasyn birge sezindi.

Kesh baǵdarlamasyn júrgizýshiler Aıbat, Rahat jáne Lýnara ashyp, turǵyndardy súıikti qalanyń týǵan kúnimen quttyqtady. Odan keıin kórermen nazaryna Aqtóbeniń tarıhy, elge eńbegi sińgen tulǵalary men týǵan jerdiń dańqyn asqaqtatqan azamattary týraly arnaıy fılm usynyldy.

Kontserttik baǵdarlama jas estrada ánshileriniń ónerimen jalǵasty. Sahnaǵa «Aqtóbe daýysy – 2026» qalalyq baıqaýynyń jeńimpazdary shyǵyp, shyǵarmashylyq ujymdar men oryndaýshylar áserli mýzykalyq nómirlerin usyndy.

Kórermender «Tamsan» tobynyń «Aqtóbem» ánin, Qýanyshbek Qaıratulynyń «Túngi qala» kompozıtsııasyn, Sabına Panabaevanyń «Ǵashyq bolý» ánin, Aqbota Qoıanbaıqyzynyń «Seniń janynda» shyǵarmasyn jáne ózge de ónerpazdardyń ónerin zor yqylaspen qabyldady. Árbir oryndaýshy kórermenniń ystyq qoshemetine bólendi.

Kórermender qazaqstandyq estradanyń tanymal juldyzdary – Bayansulu, Erkesh Hasen, Qanay, Qazybek Quraıysh, Erke Esmahan jáne RaiM óner kórsetken sátte áserge bólendi. Sahnadan ánshilerdiń kópshilik súıip tyńdaıtyn hıt ánderi men tanymal kompozıtsııalary oryndaldy. Aýa raıynyń qolaısyzdyǵyna qaramastan, aqtóbelikter kontsert sońyna deıin alańnan ketpeı, bı bılep, ánge qosylyp, merekeniń jarqyn sátterin estelikke túsirip jatty.

Al merekelik otshashý keshtiń jarqyn qorytyndysy bolyp, Aqtóbe aspanyn ásemdeı tústi.