Aqtóbelikter ınvestıtsııa salmaq bolyp aldanyp qaldy
AQTÓBE. KAZINFORM – Aqtóbelik zeınetker ınvestıtsııa salmaq bolyp, 4,7 mln teńge aqshasynan aıyryldy. Taǵy bir turǵyn áleýmettik jeli arqyly jas jigitpen tanysyp, ózine nesıe rásimdegen.
Aqtóbelik zeınetker aldanyp, keıin polıtsııadan kómek surady. Ózin sheteldik Industrial Trading kompanııasynyń menedjeri retinde tanystyrǵan beıtanys adam alǵashynda YouTube arqyly sóılesken. Keıin WhatsApp messendjeri arqyly habarlasyp ınvestıtsııa, shetel valıýtasyn satyp alý jáne qarajatty teńgege aınaldyrý týraly aıtyp, senimge kiredi.
- Alaıaq jábirlenýshiden 4 743 000 teńge kólemindegi qarajatyn ıemdengen. Aqsha mobıldi qosymshasy arqyly ártúrli shottarǵa aýdarylǵan. Jábirlenýshi alaıaqtyń arbaýyna túskenin túsingen soń birden polıtsııaǵa júgingen. Qazirgi ýaqytta kúdiktiniń jeke basyn anyqtaýǵa jáne ony ustaýǵa baǵyttalǵan jedel-izdestirý is-sharalary júrgizilip jatyr,- dep habarlady oblystyq PD baspasóz qyzmetiniń jetekshisi Erbolat Sarqulov.
Sonymen birge 29 jastaǵy aqtóbelik tanysý saıttarynyń birinde jas jigitpen sóılesedi. Keıin Telegram messendjeri arqyly habarlasady.
- Beıtanys adam oǵan tsıfrlyq aktıvterge ınvestıtsııa salýdy jáne valıýta satyp alý-satý arqyly tabys tabýdy usynǵan. Jańa tanysyna sengen áıel 2 mıllıon teńgeden astam qarajatty «ınvestıtsııa» retinde aýdarǵan. Atalǵan somanyń bir bóligi jeke jınaq, qalǵany bankten alynǵan nesıe bolǵan,- dedi Erbolat Sarqulov.
Aıta keteıik, bıyl úsh aıda oblysta 1500-ge jýyq alaıaqtyq deregi tirkeldi. Sonyń 250-ge jýyǵy dál osylaı ońaı jolmen aqsha tabamyn dep aldanǵan.
Buǵan deıin Qazaqstan Ulttyq Banki alaıaqtardyń QUB-tyń resmı blankisin qoldanyp, jalǵan qujat usynǵan jaǵdaılar jıilep ketkenin eskertti.