Aqtóbelikter azyq-túlikke qansha aqsha jumsaıdy
AQTÓBE. KAZINFORM — Bıyl oblysta jan basyna shaqqandaǵy ortasha tabys toqsanyna 365 342 teńgeni boldy. Turǵyndar tutyný shyǵysynyń 59,7 paıyzyn azyq-túlikke jumsaıdy.
Bıyl ekinshi toqsanda aqtóbelikterdiń ortasha jalaqysy 440 520 teńge boldy. Al jan basyna shaqqandaǵy ortasha tabys toqsanyna 365 342 teńgeni dep esepteldi. Statıst mamandardyń habarlaýynsha, tabystyń negizgi kózi — eńbekaqy. 73,3 paıyzy jalaqyǵa tıesili bolyp tur. Sonymen birge memlekettik tólemder de áleýmettik qoldaýdyń mańyzdy bóligine aınalǵan.
— Ekinshi toqsanda Aqtóbe oblysy turǵyndarynyń jan basyna shaqqandaǵy ortasha shyǵysy toqsanyna — 310 882 teńge. Onyń ishinde 271 138 teńge nemese 87,2 paıyzy tutyný shyǵysyna tıesili. Buǵan azyq-túlik jáne azyq-túlikke jatpaıtyn taýarlardy satyp alý, sondaı-aq aqyly qyzmetterge jumsalatyn qarajat kiredi. Tarqatyp aıtar bolsaq, tutyný shyǵystarynyń 59,7 paıyzy azyq-túlik taýarlaryna tıesili. Sonymen qatar usynylǵan derekter boıynsha tamaq ónimderi men alkogolsiz sýsyndarǵa jumsalatyn shyǵystardyń úlesi 58,3 paıyz. Respýblıka boıynsha ortasha kórsetkish — 53,6 paıyz, — dedi QR Strategııalyq josparlaý jáne reformalar agenttigi Ulttyq statıstıka bıýrosynyń Aqtóbe oblystyq departament basshysy Aıbek Ǵalymjanov.
Turǵyndar tabysynyń kóbine azyq-túlik satyp alady. Soǵan qaramastan aqtóbelikter ózge óńirge qaraǵanda etti az jeıdi.
— Oblysta et jáne et ónimderin tutyný jan basyna shaqqanda toqsanyna 18,5 keli bolyp tur. Bul respýblıkadaǵy ortasha kórsetkishten tómen. Respýblıkadaǵy ortasha kórsetkish — 21,6 keli. Sondaı-aq birqatar soltústik óńirlerdegi 24–25 keli bolyp tur. Demek azyq-túlikke jumsalatyn shyǵystardyń úlesi joǵary bolǵanymen, etti tutyný kólemi salystyrmaly túrde tómen. Sonymen birge jemis-jıdek pen kókónisti tutyný kórsetkishi respýblıkadaǵy ortasha kórsetkishten tómen. Al sút jáne sút ónimderin tutyný deńgeıi joǵary, — dedi Aıbek Ǵalymjanov.
Aıta keteıik, otbasynyń tabysy, baspanasy men nesıesi sanatyna qalaı áser etedi.
