Aqtóbelikter arasynda Telegram arqyly taraǵan habarlama úreı týdyrdy

AQTÓBE. KAZINFORM – «Konets Aktobe» degen Telegram arnasy arqyly taraǵan habarlama kópshilikti de, polıtsııany da dúrliktirdi. Qazirgi kezde mektepterdegi qaýipsizdik sharasy kúsheıtilip jatyr.

«Konets Aktobe» telegram kanalynda belgisiz bireý Aqtóbe mektepterinde terrorlyq akt jasaıtynyn aıtyp, habarlama taratty. Qazirgi kezde bul jerde tapanshanyń fotosy men vıdeosy, ashyq qoqan-loqqa sózder jazylyp jatyr. Sonymen birge alǵashqy tizimge №21 jáne №27 mektepter alynǵanyn habarlap, fotosymen birge jarııalady.

- Áleýmettik jelilerde belgisiz tulǵalar Aqtóbe mektepterinde qylmys jasaýǵa daıyndalyp jatqany týraly aqparat taralýda. Osy fakti boıynsha polıtsııa departamenti terrorızm aktisi týraly kórineý jalǵan habarlaǵany úshin sotqa deıingi tergep-tekserýdi bastady. Osy aqparatty taratqan tulǵalar anyqtalyp, eldiń zańnamasyna sáıkes jaýapkershilikke tartylatyn bolady. Oqý oryndarynyń qaýipsizdigin qamtamasyz etý, onyń ishinde beınebaqylaý arqyly jáne olarǵa jaqyn jerlerde polıtsııa jasaqtaryn kóbeıtý arqyly kúsheıtýge erekshe nazar aýdaryldy. Azamattardan arandatýshylyqqa berilmeýdi suraımyz,- dedi Aqtóbe qalalyq polıtsııa basqarmasynyń basshysy Áset Qalıev.

Aqtóbe oblystyq bilim basqarmasy da osy habarlamadan habardar.

- Qaýipsizdik organdary tolyq habardar, búginnen bastap 3 kún qatarynan bilim obektileriniń barlyǵynda kúsheıtilgen baqylaý uıymdastyrylady,- dedi Aqtóbe oblystyq bilim basqarmasynyń basshysy Jaıyq Sultan.