Aqtóbelik jolaýshy las vagon úshin moraldyq shyǵyn óndirip aldy

AQTÓBE. KAZINFORM – Atyraý-Aqtóbe jolaýshylar poıyzyna qyzymen mingen aqtóbelik turǵyn tasymaldaýshy kompanııadan moraldyq shyǵyndy ótep aldy.

Іs Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Aqtóbelik turǵyn «Júk tasymaly» AQ-nan jolaýshylar paıdasyna materıaldyq jáne moraldyq zııandy óndirý týraly azamattyq shaǵym túsirdi.

Іs materıalyna súıensek, qala turǵyny kámeletke tolmaǵan qyzymen birge «Atyraý-Aqtóbe» baǵytyndaǵy poıyzǵa otyrady. Sol kezde vagon ishiniń las, shań ekenin aıtyp, sýdyń da jaramsyz kúıge túskenin habarlaǵan.

Jolserikterden ornyn basqa vagonǵa aýystyryp berýdi surady. Biraq suraǵany bolmaı, keıin sol jerge polıtsııa qyzmetkerlerin shaqyrady. Olar vagondaǵy jaǵdaıdy foto, vıdeoǵa túsirip, tirkegen.

- Talap qoıýshy óziniń jáne kámeletke tolmaǵan qyzynyń las sýmen jýynǵanyn, las vagonda uıyqtaýyna týra kelgenin, olardyń densaýlyǵyna qaýip tóngenin aıtyp, bılet qunyn qaıtarýdy jáne moraldyq zalaldy óndirýdi surady. Sottyń sheshimimen jaýapkerden jolaýshylardyń paıdasyna 100 000 teńge moraldyq zııan jáne ókildiń kómegine jumsalǵan 200 000 teńge óndirildi. Bılet qunyn óndirý týraly talapty sot qanaǵattandyrýdan bas tartý qajet degen qorytyndyǵa keldi. Sebebi olar dittegen orynǵa jetti, ıaǵnı, tasymaldaý shartynyń talaptary tolyq oryndaldy,- dep habarlady Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń baspasóz qyzmeti.

Sot sheshimi zańdy kúshine engen joq.