Aqtóbelik jyrshylar táýlik boıy jyrlaýdy bastady
AQTÓBE. KAZINFORM — Jyrshylar aldymen nasıhat termelerin, halyq ánderi men halyq kompozıtorlarynyń ánderinen bastady. Jyr keshine Azııa men Afrıka elderi boıynsha GBR álemdik rekordtar kitabynyń bas ofıtseri Qýandyq Shyńǵysuly Qudaıbergenov qatysyp otyr.
Aqtóbedegi Halyq shyǵarmashylyǵy ortalyǵynda qazir jyrshylar terme, dastan aıtyp jatyr. Jyr keshi tórt bólimge bólingen. Aldymen nasıhat termesi, halyq ánderi jyrlandy. Al II, III, IV bólimderde «Qyrymnyń qyryq batyry» jyrlanady. V–VI bólimde «Dinı qıssala» men «Nasıhat» termeleri aıtylady.
— Óte qysqa merzimde sheshim qabyldandy. Sheteldegi 13 sarapshynyń ishinen tórteýi qarsy boldy. Kópshilik qoldaýymen joba qoldaý tapty. Negizi Fınlıandııa memleketiniń eposy álemge tanymal eken. Barlyq eposty, folklorlyq jyrdy rekordqa kirgizip alǵan el osy. Basqa halyq rekordqa kirmegen. Sóıtip aqtóbelikter túrkitildes elder ishinde, uly dala halyqtary ishinde birinshi bolyp álem rekordy kitabyna enedi, — dedi Jyr jobasyna Azııa men Afrıka elderi boıynsha GBR álemdik rekordtar kitabynyń bas ofıtseri Qýandyq Qudaıbergenov.
Jyr jobasy rekordtar kitabynyń talabyna sáıkes taspaǵa túsiriledi, arnaıy sarapshylar táýlik boıy baqylap otyrady. Jyrshylar shyǵarmashylyq úıine qonady, osynda aýqattanady. Olardyń árqaısysynyń óz kezegi bar.
Epostanýshy ǵalym Asqar Turǵanbaevtyń aıtýynsha, «Qyrymnyń qyryq batyry» dastanyn mamandar 1942 jyldan bastap jazyp alǵan. Aqtóbelik jyr mektebiniń jyrshylary dál sol nusqany oryndaıdy.
Buǵan deıin habarlaǵanymyzdaı, «Er Edige» jyr mektebiniń jetekshisi Ádilbek Sarınniń aıtýynsha, bul kúni 33 oqýshy men 2 muǵalim jyr aıtady. Olardyń biri 4-5 saǵat, taǵy biri 15-20 mınýt jyrlaıdy.