Atadan qalǵan ónerdi qaıta jańǵyrtqan aqtóbelik sheber sybyzǵy jasap júr
AQTÓBE. KAZINFORM — Baqythan Seıitqalı biraz jyl boıy saýda jasap, tabys tapty. Búginde ulttyq ónerdi qolǵa alǵan. Ol qaraǵaı, shyrsha, qaıyń sııaqty birneshe aǵash túrinen úsh, tórt, alty jáne jeti oıyqty sybyzǵy jasaıdy.
Aqtóbe oblysy Alǵa qalasynyń turǵyny Baqythan Seıitqalı — birneshe jyl buryn Mońǵolııadan qonys aýdarǵan qandas. Ol qazaq tili men ádebıeti páni muǵalimi bolǵanymen, naryq ony saýda salasyna yǵystyrdy. Jyldar boıy bala-shaǵasynyń qamyn oılap, tabys tapty. Al egde shaǵynda óziniń súıikti isin qaıta qolǵa aldy. Qazir Baqythan Seıitqalı ózi turatyn qaladan aǵash jınap, sybyzǵy jasaıdy. Shıkizat jetkilikti, alysqa uzamaıdy.
— Ózim 18 jasymnan bastap sybyzǵy tarta alamyn. Al sybyzǵy jasaýdy ákemnen, atamnan úırendim. Janynda júrip, bárin meńgerip alǵanmyn. Arada ondaǵan jyldar ótken soń qaıta jańǵyrtqym keldi. Ózim kóshede, úı arasynda júrgende kesilgen butanyń jaramdysyn qarap, tańdap alamyn. Keıin ony úıge ákelip keptiremin. Sheber aǵashty tańdaı bilýge tıis. Ózim ózegi, butaǵy joq aǵashty tańdap alyp, bir aıǵa jýyq keptirip qoıamyn. Eger tańdap alǵan aǵashtyń ózegi bolsa paıdaǵa aspaıdy. Ol ýaqyt óte kele shirip ketedi. Sodan keıin arnaıy qural-saıman arqyly qaq jaryp, ortasyn oıyp alamyn. Qalyńdyǵy 3 mm ǵana bolýǵa tıis. Oıyq sany notaǵa qaraı jasalady. Notaǵa saı jasalmasa, dybysy shyqpaıdy, — deıdi Baqythan Seıitqalı.
Sheberdiń aıtýynsha, buryn sybyzǵy qamystan jasalǵan. Al qazir qamys sybyzǵyǵa suranys joq, aǵashtan jasalǵan aspapqa qyzyǵatyndar kóp eken. Baqythan Seıitqalı saýdany áleýmettik jeli arqyly jasaıdy. Baǵasy — 45 myń teńge.
— Jastarǵa úıretýdi armandaımyn. Ulttyq qundylyqty dáriptep, sybyzǵy aspabyn kópshilik arasynda tanymal etkim keledi. Qazir bul aspapqa kóbine óner salasynyń mamandary qyzyǵady. Al naǵyz sybyzǵy sheberi az. Almatyda bar ekenin bilemin. Meniń utqan tusym — dástúrli ádis. Aǵashtan oıyp ázirleımin. Qaraǵaı, shyrsha, qaıyń aǵashtaryn paıdalanamyn. Úsh, tórt, alty jáne jeti oıyqty sybyzǵy jasaımyn. Buryn sybyzǵy aǵashy qısaıyp ketpeýi úshin ata-babamyz óńeshpen, aşy ishekpen qaptaǵan. Sol kezde qısaımaıdy, aǵashy jarylyp ketpeıdi. Ári úrlegen kezde dymqyl tartyp, negizi búlinbeýge jaqsy. Sybyzǵynyń qudireti — án de, kúı de oınaıdy, qara óleńdi naqyshyna keltiredi, tabıǵattyń áýezin qulaqqa ákeledi, — deıdi Baqythan Seıitqalı.
Sheber sybyzǵy jasap qana qoımaı, jastarǵa aspapta oınaýdy úıretedi. Keıbiri birer sabaqta meńgerip alsa, keıbirine bir aıǵa jýyq ýaqyt qajet.
Eske salaıyq, buǵan deıin aqtóbelik sheber Aınagúl Álıeva týraly jazǵan edik. Ol ájesinen kórgenin oıǵa túıip, boıyna darytty. Qazir sheber qolynan shyqqan dúnıeni kórsetip, el ishindegi kórmelerge qatysyp júr.
