Aqtóbelik zeınetker 13 mln teńgesinen aıyryldy
AQTÓBE.KAZINFORM – Aqtóbede 75 jastaǵy qarııa alaıaqtardyń qurbany boldy. Ol ekinshi deńgeıli bank esepshotyndaǵy 13 mln teńge aqshasynan aıyryldy.
Aqtóbe oblystyq PD baspasóz qyzmetiniń habarlaýynsha, óńirde kún saıyn alaıaqtyq deregi tirkeledi. Túrli eskertýge qaramastan, turǵyndar qupııa ustaýy tıis aqparatty beıtanys adamǵa berip, barynan aıyrylyp qalyp jatyr.
«Zeınetkerge belgisiz adam qońyraý shalyp, ózin ekinshi deńgeıli bankterdiń biriniń qaýipsizdik qyzmetkeri retinde tanystyrǵan. Qońyraý shalýshy alaıaqtar onyń atynan nesıe rásimdep jatqanyn jáne muny toqtatý úshin jınaq aqshasyn qaýipsiz shotqa aýdarý kerektigin aıtqan. Jábirlenýshi qońyraý shalýshynyń barlyq aıtqanyn oryndaǵan. Nátıjesinde alaıaqtar onyń shotynan 13 mln teńge somasynda aqsha alǵan. Alaıaqtyq deregi boıynsha kúdikti adamdy anyqtaýǵa jáne ustaýǵa baǵyttalǵan tergeý áreketteri júrgizilip jatyr», - dedi oblystyq PD baspasóz qyzmetiniń jetekshisi Erbolat Sarqulov.
Eske salsaq, Aqtóbe oblystyq PD-de Kıberpol qyzmeti jumys istep tur. Munda byltyr myńnan astam is tirkeldi. Aqsha aýdarý onlaın júretin bolǵan soń bul baǵyttaǵy istiń kóbi ashylmaǵan.
