Aqtóbelik tutynýshylar bıyl 77 mln teńge aqshasyn keri qaıtaryp aldy

AQTÓBE. KAZINFORM — Tutynýshylardyń quqyǵy bólshek jáne elektrondy saýdada jıi buzylady. Byltyrǵa qaraǵanda bıyl shaǵym 41% artty. 

Aqtóbe oblystyq tutynýshylardyń quqyǵyn qorǵaý departamentine bıyl 1300-den astam ótinish tústi. Kóbi bólshek saýdadaǵy ádiletsizdikti aıtyp, arasha surady.

Ótinishtiń 500-ge jýyǵy osy salaǵa tıesili. Sonymen birge kólik, týrızm, kommýnaldyq qyzmet pen medıtsına, bilimge qatysty shaǵym da bar. 

— Bólshek jáne elektrondy saýdada zań buzý kóp. Taýardy 14 kúnde keri qabyldaýdan bas tartady, aıyrbastamaıdy. Sonymen birge onlaın tapsyrys berip, onyń sapasy kóńilden shyqpaıdy. Tutynýshy jazbasha narazylyq paraǵyn toltyrsa, 10 kúnde jaýap bolýy tıis. Al taýar satýshysy oǵan mán bermeıdi. Nátıjesinde ótinishtiń 735-i rastalyp, 77 mln teńge qaıtaryldy. Sonymen birge qalǵanyna quqyqtyq kómek berildi. Keıbiri ótinishti keri qaıtaryp alyp jatyr, — dedi oblystyq saýda jáne tutynýshylardyń quqyqtaryn qorǵaý departamentiniń bas mamany Aqbota Jumamurat.

Tutynýshy sotqa shaǵym túsirip, turaqsyzdyq aıybyn, moraldyq zııandy, ókil shyǵynyn óndirip ala alady. Oblystyq saýda jáne tutynýshylardyń quqyqtaryn qorǵaý departamentiniń mamandary bıyl 43 sot otyrysyna qatysyp, 34 mln teńge óndirdi. Taǵy da 10 is sotta qaralyp jatyr.

— Tutynýshy quqyǵyn buzǵan 35 kásipkerlik sýbektisine tutynýshy quqyǵy, 116 kásipkerlik sýbektisine saýda salasy boıynsha ákimshilik shara qabyldandy. Eskertý berilip, aıyppul salyndy, — dedi Aqbota Jumamurat.

Eske salsaq, Qostanaı oblysynyń Saýda jáne tutynýshylar quqyǵyn qorǵaý departamentine massajdy japqyshtardy satyp alýǵa qatysty aqshany qaıtarý úshin sotqa deıingi talap-aryz jazýǵa kómek surap kelip túsken ótinishter kóbeıdi. Azamattardyń aıtýynsha, kóshede belgisiz adamdar konverttegi «utylmaıtyn lotereıany» usyný arqyly túrli turmystyq tehnıkany (shańsorǵysh, útik, mıkrotolqyndy pesh jáne t. b.) «syılyqqa» beredi.