Aqtóbelik turǵyn qala jastaryna atqa minýdi úıretip júr
AQTÓBE. KAZINFORM - Aqtóbe qalasynyń turǵyny Rýslanbek Kádirov qala balalary men jastaryna atqa minýdi úıretti. Baý-baqsha ujymynyń turǵyndary Naýryz merekesinde de taı jarysyn ótkizdi.
Aqtóbe qalasyndaǵy ÝVD baý-baqsha ujymynyń turǵyndary Naýryz merekesine oraı kıiz úı tikti. Kıiz úı - atadan balaǵa mıras bolyp kele jatqan eski úı. Mundaǵy jabdyq taza aǵashtan, taza kıizden jasalǵan. Sonymen birge turǵyndar kók týdy ilip, ózderi de ulttyq kıim kıdi. Bul baý-baqsha ujymynyń balalary da aldyn ala daıyndalyp, qamzol, búrmeli kóılegin kıip kelgen. Oqýshylar men balabaqsha tárbıelenýshileri arqan tartyp, ózara myqtyny anyqtady. Eresekter olarǵa arnap syılyq ázirlep, taratty. Keıin aýmaqta turatyn balalar arasynda taı jarysy ótti. Qazir baý-baqsha ujymynda taı ustap, atqa minýdi úıretip otyrǵan birneshe jeke kásipker bar.
- Jastar atqa minýge qyzyǵady. Keıbiri birinshi kelgen kúni qorqady. Sonda da óz qorqynyshyn jeńip, úırenip ketedi. Kóbine oqýshylar, stýdentter áýes. Bilmegenin úıretemiz, attar jýas bolǵan soń bárine yńǵaıly. Bizde bir aılyq kýrs bar. Bala kelip, atqa minýden bastap, shabýǵa deıin úırenedi. Bári adamǵa baılanysty. Bir-eki ret kelgennen-aq meńgerip alatyny bolady. Ony az kórgenderi 12 ret keledi. 8 sabaq 20, al 12 sabaq 30 myń teńge. Buǵan jan-jaǵymyzdaǵy kórshilerdiń renish bildirgenin kórmedim. Ózimde 8 jylqy bar,- dedi aqtóbelik Rýslanbek Kádirov.
Ol buǵan deıin memlekettik qyzmette jumys istegen. Únemi kompıýterde otyrǵan soń densaýlyǵy syr berip, omyrtqasy aýyrǵan.
- Dárigerler «atqa minse adamnyń omyrtqasy túzeledi» dep aıtty. Ras eken. Densaýlyǵym jaqsardy. Sonymen qatar balalar atty saıabaqqa aparyp, turǵyndarǵa qyzmet kórsetti. Óz-ózin aqtaǵan soń osy isti shyndap qolǵa aldyq. Memlekettik qyzmetten 2017 jyly kettim. Qazir osy isti ózge kásippen qatar damytyp júrmin. Ózimniń densaýlyǵym qalpyna keldi. Adamdar prostatıtke shaldyǵyp, atqa minýge keledi, emdeledi. Bul jerdegi balalar jylqynyń ne ekenin bilmegen edi. Biz ustap, endi qolǵa alǵanda qyzyǵyp, janymda júrdi. Al qazir olar asaýdy úıretedi. Endi osy kásipti ári qaraı damytyp, saıdyń boıynan sharýashylyq ashsam deımin. Adamdar tabıǵat aıasynda atpen serýendegendi jaqsy kóredi. Sonymen birge qysta jabyq alań suraıdy. Qalada baǵasy qymbat, sony qoljetimdi etkim keledi,- dedi Rýslanbek Kádirov.
Qazirgi kezde Aqtóbede at ustap, turǵyndarǵa qyzmet kórsetip otyrǵan adamdar kóbeıip keledi. Olardyń keıbiri bir-birine jaqyn ornalasyp, qoldaý bildiredi.
- Men kásipti ózim bastadym. Suranys kóp bolǵan kezde at jetpedi. Osy aýmaqta turatyn eki adamǵa aıtyp, sharýa bastaýǵa keńes berdim. Qazir bir aýmaqta úsh sharýashylyq bar. Olarda da at jetkilikti. Jylqy kerek bolǵan kezde bir-birimizge beremiz. At bir aýmaqta júredi,- dedi ol.
